По вчерашното разрешување на потпретседателот на партијата и актуелен градоначалник на Кавадарци, Митко Јанчев, на синоќешната седница на Централниот комитет на ВМРО- ДПМНЕ, Јанчев се огласи на својот фејсбук профил.
„На вчерашната прес-конференција на ВМРО-ДПМНЕ до мене беа упатени неосновани обвинувања. Обвинувањата беа насочени кон мене како потпретседател на ВМРО-ДПМНЕ но и лично како индивидуа.
Претседателот на ВМРО-ДПМНЕ г-дин Христијан Мицковски на вчерашниот ЦК даде предлог за мое разрешување од функцијата потпретседател. Како лидер на најголемата политичка партија во Република Македонија му доликува разрешувањето од функцијата потпретседател да го води крајно професионално па дури и да упати благодарност до мене за моите досегашни вложувања во партијата, но уште поважно да ја почитува функцијата Градоначалник на Општина Кавадарци од редовите на ВМРО – ДПМНЕ која од досега сработеното носи само успех најмногу за Општина Кавадарци но и за ВМРО-ДПМНЕ“, напиша Јанчев.
Според него, на вчерашната прес-конференција од Александар Николовски биле упатени ниски и агресивни обвинувања за закани, поткуп и криминал, кон Јанчев, рамо до рамо со Сашо Мијалков, и поради таквите навреди од Мицкоски и Николовски бара јавно извинување од двајцата.
„Во спротивно кон нив двајцата ќе поднесам приватни тужби за клевета и навреда на мојата личност.
Различниот став и различното размислување во една нормална модерна партија треба да бидат прифатени, дискутирани и потоа заеднички да се најде вистинскиот пат, но тоа не е случај и со ВМРО-ДПМНЕ. Моето залагање за партијата ќе продолжи со сите мои способности и целосна професионална посветеност. Различните ставови во една партија и почитувањето на истите можат само да водат кон прогрес и плодна почва за развивање на дискусии и создавање на темели за партија која ќе се движи кон посветла иднина.
Мојата почит кон членовите на ВМРО-ДПМНЕ е голема и ќе продолжам гордо како Градоначалник на Општина Кавадарци од редовите на ВМРО-ДПМНЕ да дејствувам во интерес на граѓаните“, додаде Јанчев на својот профил.
Никола Тодоров, на својот фејсбук денес напиша дека овој ден го дочекал со голема тема и разочараност, но не од фактот што е даден предлог за негово исклучување од партијата.
„Не, тоа не е причината за мојата разочараност, бидејќи знам дека не ме исклучија и не можат да ме исклучат од мојата партија. Ме исклучија од трансформираната фракција на ВМРО, трансформирана во Анти-западна, Анти – ЕУ и Анти-НАТО фракција, управувана од луѓе кои се водени и заробени од сопствената суета и кои практикуваат застарени методи на политичко дејствување наметнато од старите удбашки структури кои се уште се поклонуваат на туѓи антимакедонски и антизападни пропаганди и интереси. Во таква антиреформска, антизападна, недемократска и антимакедонска фракција на ВМРО јас не се пронаоѓам“, напиша Тодоров.
Според него, во неговата ВМРО, е забранет непотизмот и забрането е раководството од ОК и ИК да си ги вработат сите роднини во државната администрација или да си ги постават на високи партиски или државни функции.
„Мојата ВМРО-ДПМНЕ не е изолирана партија. Како што кажав мојата ВМРО-ДПМНЕ е европска, модерна, центар-десна политичка партија. И јас сум сеуште со срцето и душата во ВМРО-ДПМНЕ и никој, никој не може да ме исклучи од мојата партија. Семејството, државата и партијата ми се најважните“, додаде Тодоров.
Николоски изјави дека Митко Јанчев и Костадин Богданов се разрешени заради дејствување спротивно на интересите на ВМРО-ДПМНЕ и на Македонија, заради силна соработка со Зоран Заев како и заради организирање на група за притисоци, уцени, закани и поткуп на пратеници од коалцијата, со цел да гласаат за уставните измени.
А. Петровска