Секторот за комјутерски криминал и дигитална форензика при Министерството за внатрешни работи презема мерки за расчистување на случајот „Јавна соба“, велат од МВР за МИА.
Од министерството повикуваат секоја жртва на ваква злоупотреба да пријави во најблиската полициска станица, а МВР во координација со обвинителството ќе преземе соодветни мерки.
„Ќе продолжиме и со интензивните напори да се оствари и директна комуникација со платформата Телеграм која до сега демонстрира цеосна затвореност за соработка со владите на државите од која било земја. Се разбира ги користиме сите други активности кои ни се на располагање за расчистување на овој случај“, наведуваат од МВР.
„Јавна група“ повторно се актуелизира деновиве откако беше обелоденето дека на социјалната мрежа Телеграм над 5.600 членови на групата споделуваат фотографии, профили од социјални мрежи, лични податоци, адреси и броеви од девојки.
Денеска една девојка, жртва на „Јавна соба“, на социјалната мрежа Инстаграм објави видео во кое вели дека во „Јавна соба“ биле објавени нејзина фотографија, број и градот каде живее.
„Почнав да добивам пораки и повици на мојот мобилен, на вајбер, на ватсап, на месинџер и на инстаграм. Не знаев што се случува и од каде доаѓа тоа. Се додека наредниот ден не добив скриншот од мојата слика, зашто таа слика не само што беше објавена во „Јавна соба“, туку е препраќана и на други места“, вели девојката во видеото.
Девојката додава дека се преплашила бидејќи досега не и се случило такво нешто и случајот го пријавила во Одделот за сајбер криминал да пријави.
„Им ја покажав сликата, им ги покажав пораките, повиците. Им кажав дека ги имам со име и презиме луѓето кои што ми ѕвонеа и пишуваа. Меѓутоа, кога слушнаа дека сум полнолетна ми рекоа дека не можат ништо да направат бидејќи Законот во нашата држава е само за малолетници за вакви случаи. Јас во тој момент се почувуствував толку беспомошно и бесно што навистина не знаев што да направам и каде да се обратам. Изгубив секаква надеж, многу се разочарав и видов дека во државава не постои правда, дека ако ние имаме над 18 години немаме никаква заштита. Токму поради тоа луѓето се осмелуваат на вакви работи зашто знаат дека никој ништо нема да им направи“, вели жртвата во видеото.
Овој случај беше откриен минатата година, каде беа регистрирани околу 7.000 корисници кои си разменуваа експлицитни фотографии од девојки, од кои и некои беа малолетни, група која полицијата наводно ја згасна, но таа е се уште активна.
Имено, полицијата минатато година истражуваше и дали „Јавна соба“ е гнездо за контакти и ланец за подведување, проституција, вклучително и малолетничка.
А. П.