Прво задолжување на државата од речиси 48 милиони евра на домашен пазар по формирањето на новата влада. Денеска на Македонска берза излегуваат нови државни обврзници со рок на враќање од 15 години. Министерството за финансии ја издало пред една недела.
Како што пренесува Градска.мк, според информацијата од берзата, овие хартии од вредност се без девизна клаузула. Емисијата е со вредност од 2.947.340.000 денари (47,87 милиони евра). Издадени се 294.734 обврзници со единечна номинална вредност од 10.000 денари. Каматна стапка е 5,6%.
Оваа информација на Берзата се појави еден ден откако министерката за финансии Гордана Димитриеска-Кочоска информираше за ребалансот на Буџетот обвинувајќи дека државната каса која ја наследила новата влада била оштетена за повеќе од 500 милиони евра.
На прес-конференцијата во Владата таа најави и нови домашни задолжувања, но не еден ден по ребалансот, туку кон крајот на годината и на почетокот на следната кога доспеваат најголемите долгови кон странските кредитори, еден од нив и еврообврзницата од 500 милиони евра.
Следниот јануари доспева еврообврзницата од 500 милиони евра и таа ќе мора да се врати преку издавање на нова или задолжување на друго место, вели министерката за финансии Гордана Димитриеска-Кочоска.
– Имаме проблем со јануари, немаме проблем до крајот на годината да обезбедиме средства. До 25 јануари треба да ја исплатиме еврообврзницата од износ од 500 милиони евра меѓутоа во исто време имаме и државни хартии од вредност кои беа земени во 2020 година во износ некаде околу 136 милиони евра.
Како што соопшти Димитриеска-Кочоска, сега тие мора да се вратат, можеби ќе има повлекување и враќање, но мора да ги разгледаме сите опции кои ни стојат на располагаање.
Не сме многу среќни ако треба да ја земеме еврообврзницата затоа што условите се високи, а заемот од Унгарија е со многу поволна камата. Од таа причина ние ќе правиме напори да ги обезбедиме средствата од унгарската влада, ако не ги земеме, тогаш ќе мораме да одиме со издавање на еврообврзница – рече Димитриеска-Кочоска.
Претходната техничка влада во два наврати издаде по две државни обврзници. Прво на 10 мај во вкупен износ од близу 35 милиони евра кои доспеваат во 2026, односно 2039година. Имаат каматни стапки од 3,85 и од 5,6 проценти. Потоа на шести јуни, преку кои задолжувањето е од речиси 26 милиони евра. Доспеваат во 2029 и 2039 година со камата од 4,2 и 5,6 проценти.
