Врз основа на добиените сознанија и објавените текстови од експерти на порталот ЦИВИЛ Медиа, во неколку колумни и написи до сега, беа изнесени многуте нелогичности и неправилности во унапредувањето и поставувањето генералите во АРМ.
Едно од поставените прашања до претседателот на РМ, од страна на ЦИВИЛ- центар за слобода, објавено на 15.03.2018 година, беше за условите за унапредување и поставување на бригадниот генерал Мирче Ѓоргоски, на којшто највисока должност која ја извршувал му била командир на батерија.
Истиот е поставен за командант на здружено-тактичка единица, за која треба поголемо познавање и пракса за успешно командување и употреба на единици од овој ранг. Во исто време, старешини кои „израснале“ на сите должности во истата бригада и нејзината команда и кои имаат организирано и изведено повеќе тактички вежби, за кои биле оценети со многу високи оценки од страна на претставници и оценувачки тимови од НАТО, или се тргнати настрана или се пензионирани.
Началникот на ГШ на АРМ, генерал-потполковник Методија Величковски, во повеќе написи, беше споменуван за секс скандали, мобинг, како и во функционирањето воопшто. Во поставувањето на командниот и раководниот кадар во АРМ, се раководи од својата партиска определеност, притоа не почитувајќи го член 47 од Законот за одбрана. Дали Величковски сака да каже или кажува: „АРМ, тоа сум јас“, па така по некои свои критериуми и ги поставува своите блиски на клучни места во ГШ, како и командантите и раководителите во потчинетите команди и единици. Тоа во голема мера негативно влијае на моралот кај потчинетите во командите и единиците, што негативно се одразува и претставува проблем и при извршувањето на работните задачи кај истите.
Францускиот крал Луј XIV, рекол: „ l’État, c’est moi“, „ Државата тоа сум јас“, но на крајот на владеењето рекол: “Je m’en vais, mais l’État demeurera toujours“, „Јас заминувам, но државата секогаш ќе остане”. Што ли ќе каже генералот Величковски?
Но има и други прашања во врска со неправилностите при поставувањето на високи старешини на должности во командите и единиците на АРМ, кои јавноста треба да ги знае, а за кои решава НГШ, генерал Методија Величковски.
КРС=Команда за Резервни Сили. Со одлука на претседателот на РМ, за формирање на оваа команда во 2015 година, за пополна на истата, НГШ, генерал Величковски, лично изготвил список на старешини кој на која должност да биде поставен и дал задача да се изготват наредбите за поставување. За командант на КРС се поставува најмладиот полковник, Ќиро Калков, кој што во чинот полковник е неполна година, а најголема должност му била командант на баталјон (не ги исполнува сите критериуми од оценувањето од член 52 од Законот за служба во АРМ).
Поискусните старешини, кои во својата кариера извршувале повисоки должности од Калков (заменици на команданти и команданти на бригади, Главен инспектор во Здружена оперативна команда, биле воено дипломатски претставници на РМ итн.) се поставуваат на пониски должности.
За заменик ме поставија мене, во тоа време бев осум години во чинот, имав извршувано многу повисоки должности, на 4-та позиција во КРС се поставува полковник Зоран Јовановски кој, покрај извршувањето на повисоки должности, е и доктор на науки од областа на одбраната, итн. Со поставувањето, кај старешините се јавува незадоволство, револт, бидејќи, покрај другото, имаат и финансиски импликации, односно платите им се намалени по 2-4.000 денари, а на некои и повеќе.
Поради тоа, поднесуваат жалби на наредбите за поставување, а до Комисијата за решавање во управна постапка во втор степен од одбраната на Владата на РМ, но бидејќи им се одговара негативно, еден дел од нив поднесуваат и тужби и почнува судска постапка која трае и ден денес. Во текот на постапката, судот бара увид во Формацијата за КРС, да се увери дека поставувањето на старешините е според актот на формацијата. При тоа се востановува дека Формацијата на КРС не е потпишна од страна на Врховниот командант на ВС, претседателот на РМ, што значи дека истата не важи.
И сега почнува истрагата кој е крив. Нормално „рибата смрди од главата, но се чисти од опашката“. Последен во синџирот на изработката на формацијата е полковник Митко Саралиев и тој мора да е крив.
Од страна на ГШ се поведува иницијатива за водење на дисциплинска постапка против полковник Митко Саралиев, дека не кажал дека формацијата на КРС не е потпишана, па така персоналот од ГШ, не знаејќи за непотпишаноста, ги изготвил наредбите за поставување на старешините во КРС.
Во текот на постапката, комисијата, предводена од мене, ги разгледува изјавите на сведоците сослушани во иницијативата, во кои што е наведено дека НГШ, генерал Величковски директно му издавал наредби и насоки на полковник Саралиев (прескокнувајќи две скалила во системот на командување, Директорот на ГШ, генерал Димче Петровски и началникот на Ј-5 ). Во исто време кога на Саралиев му издал насоки за работа на формацијата, генерал Величковски на шефот на Кабинет му го дал списокот на старешини за поставување во КРС, а овој ги предал на началникот на Ј-1, Секција за управување со персонал, да ги изготви наредбите за поставување. Началникот на Ј-1 од Шефот на кабинет на НГШ ја бара книгата на формација на КРС, на што од шефот на Кабинет добил одговор дека сѐ уште се работи на формацијата и дека ја имаат во електронска форма, но не и тврда копија.
Овие дејствија се одвиваат на 7 и 8 октомври 2015 година, а наредбите за поставување се потпишани на 9 октомври 2015, што говори дека инволвираните во изработката на наредбите знаеле дека формацијата не е потпишана.
Согледувајќи го горенаведеното, комисијата за водење на дисциплинска постапка оцени дека нема одговорност на лицето и предложи запирање на постапката.
Со ова е повредена суетата на НГШ, кој силно бил решен полковникот Саралиев да биде казнет.
Авторот е полковник во пензија.