Љавдие Калеши е жртва на поплавите минатата година. Нејзината куќа е целосно руинирана и оштетена од надојдената вода. Фотографиите сведочат дека во неа нема услови за живот. Институциите им понудиле сместување во Државниот студентски дом „Томе Стефановски – Сениќ“. Отука започнува нејзината приказна…
Љавдие, нејзината мајка и баба Благојна се единствените што останаа од повеќе од 250 граѓанки и граѓани што биле сместени во студентскиот дом. Според нејзините зборови, помошта најпрвин стигнала од надлежните од Месната заедница во Инџиково кои ги сместиле во домот, бидејќи имал подобори услови од другите прифатни центри.
Поради усната забрана од директорот Љуљзим Џемаили, на новинарската екипа на ЦИВИЛ Медиа не ѝбеше дозволено снимање внатре во просториите каде што живее Љавдие.
Новинарите на ЦИВИЛ Медиа дури беа и претресени на влезот во објектот!
Во разговорот што го водевме во просторијата каде живее, без камера, поради забраната на директорот, Љавдие ни рече дека рокот за иселување е поминат (15 јули), а трите жени се во неизвесност кога ќе им тропне полиција на врата, како што рекол директорот – како последна мерка, доколку доброволно не си заминат.
„Тука сме во една соба, а сега, и водата ни ја исклучија, еве, веќе 12 дена без топла вода и пет дена без вода за пиење“, ни изјави Љавдие Калеши.
Речиси сите институции се запознаени со нивниот случај, владата, старата, но и новата, и премиерот Зоран Заев, Народниот правобранител, Министерството за труд и социјална политика, Општина Гази Баба, како и повеќе граѓански организации што се обиделе да им помогнат.
Во продолжение на сторијата, ЦИВИЛ Медиа утре ќе објави интервју со директорот на студентскиот дом, Љуљзим Џемаили.
Биљана Јордановска
Камера: Дехран Муратов