„2018 би ја опишал како парадоксална година. Декларативно, работите звучеа поинаку отколку во пракса. Се започна иницијатива за градење на едно општествоза сите, меѓутоа продолжи да се бутка етничката агенда. Сè се сведе на политизирања, пазарења, поддршка за одредени реформи и промени како уставните измени… Како припадник на ромската етничка заедница не сум баш задоволен од тоа што се случуваше во 2018 година, бидејќи не добивме многу внимание и улога во процесите што се одвиваа во државата“, изјави Акиф Кариман од здружението Романо Авази, Тетово, во разговор за ЦИВИЛ МЕДИА за Перспективи 2019.
Кариман се осврна и на иницијативата за владиниот проект „Едно општество за сите“, сметајќи дека во таа стратегија постои можност да им се даде приоритет на помалите етнички групи, но и дека Македонија е далеку од постигнување на вакво општество.
„Помалите заедници во Македонија не се доволно гласни. Исто важи и за мене. Од друга страна, ниту самите обликувачи на јавното мислење, пред сè, мислам на медиумите, не даваат можност на помалите заедници да добијат време во тие медиуми, за да ги споделат своите ставови и маки… Мислам дека е крајно време политичките елити да преземат чекори за позагрозените заедници. Не мислам само на Ромите. Мислам на сите оние подгрупи, условно речено заедници под 20%, меѓутоа, можеме да направиме и поинакви групирања, сиромашни и богати, вработени и невработени итн. И тука ќе видиме дека гапот е многу поголем меѓу ромската заедница и останатите заедници, а тоа не е во интерес на државата“, изјави Кариман.
Што се однесува до 2019 година, Кариман се надева дека ќе има вработувања на групите што имаат помала застапеност во јавните институции и поголеми средства за унапредување на статусот на овие заедници.
„Имаме добри политики, имаме стратегии, препораки, но треба да се вложи во нивно имплементирање. За една година не можат да се случат чуда. Сепак, 2019 нека биде тест година каде ќе се покаже дека работите навистина одат на подобро“, рече Кариман.
Биљана Јордановска
(текст, камера, монтажа, фотографија)