Коалицијата О2, Здруженијата на граѓани „Карпош 3“ и „Ние сме Карпош 4“ на 4 мај ќе одржат протест пред Уставниот суд за решавање по претставките веќе доставени до судот по одредени ДУП-ови.
Во нивниот повик се вели дека не се запира со изградба на станбени објекти на спорните локации ДУП З 06 (Тафталиџе 1), ДУП З 04 (помеѓу Илинденска и р. Вардар, од поранешен Имес до Александар Палас), ДУП З 05 (Лептокарија, поштата… Карпош 3) и ДУП СЗ 19 (Влае 2).
„За сите ДУП- ови, на почетокот на минатата есен, поднесени се иницијативи пред Уставниот суд за оценување на уставноста и законитоста на Одлуката на донесување на ДУП-от. Беше побарано од Уставниот суд да донесе и времена мерка за запирање на сите активности до носење на конечна одлука. Времена мерка Уставниот суд не донесе, ниту пак поведе постапка за трите од 4-те иницијативи, иако случајот е јасен“, велат организаторите на протестот.
Тие ги обвинуваат судиите чии предмети се овие иницијативи за арогантно и криминално однесување, а од Владата бараат во најбрз можен рок да спроведе соодветни измени на законите според кои работата на уставните судии ќе подлежи на контрола, со јасни казнени одредби, каде ќе има рокови во кои ќе мора да одлучат по примените предмети, во спротивно ќе бидат разрешени.
„Јасно е дека уставните судии не работат согласно нивната функција да го штитат Уставот, туку работат за некого и штитат нечии други интереси. Во нормална земја овие судии не би биле судии и правото да судат и носат правда би им било трајно одземено“, стои во повикот.
„Прашањето е Зошто? Потребните информации се одамна добиени. Истите судии знаеле да одлучат по поднесена иницијатива во експресен рок, за помалку од месец дена. Но, во овој случај, одлучиле да ги остават по страна и не постапуваат по нив. Кај нас, работите си течат како да е се’ регуларно, иако не е, судиите не понесуваат одговорност, иако треба, нема никакви последици по нив, никој не е разрешен поради вакво однесување, а треба“, велат организаторите.
Причината за протестот е што Општина Карпош не ја објавила одлуката за носење ДУП со што постапката не е во целост запазена и како што велат организаторите со тоа се повредува начелото на владеење на правото како темелна уставна вредност.
Б.Ј.
