Навивачката група Комити, чиј водач своевремено беше и осудениот воен злосторник Јохан Тарчуловски, утрово, пред самото потпишување на историскиот Договор во Преспа, излезе со Фејсбук соопштение во кое изнесе отворени закани. Во него се вели дека не се со ниедна партија, што се совпаѓа со лабилниот карактер на ова здружение – час се со ДПМНЕ, час не се, по потреба. Соопштението го пренесуваме во целост:
„Недела 17.06 2018, со почеток во 20 часот, повторен собир пред собранието на Република Македонија. Ќе повториме дека ние, иако не зeмаме пари за одбрана на татковината како полицијата и војската, како граѓани, должни сме да излеземе и да си го браниме ова наше парче земја. Ги повикуваме повторно сите навивачки групи и сите слободоумни патриоти да дојдат, да се сплотиме како едно. Ако не сте во можност да дојдете во Скопје, организирајте се локално.
Последен пат ве повикуваме на мирен протест, а за наредниот период нека се мислат. Нас, апсења и притисоци не не плашат. Порака до тие што се закануваат: ние не сме ни “режимот”, а ни “шарената револуција”, ние сме Комити и ќе ве најдеме, а останатото сте го читале во учебниците по историја. Запомнете, борбата е да им го смениме менталитетот на нашите политичари, да научат да ги ценат и бранат интересите на Македонскиот народ, а не да ги распродаваат. Никој не е посилен од народот кога е сплотен.
Затоа, ве замолуваме, раширете го идеалот за слобода, соберете ги вашите најблиски и без страв излезете на улица, ве повикува вашата мајка, Македонија! Да живее Македонија!!!“
Овие закани од Комитите доаѓаат по вчерашниот Фејсбук повик од Тврдокорните до Иванов, да прогласи воена состојба. Во нивниот повик се вели: „Почитуван ЃОРГЕ ИВАНОВ, ПРЕТСЕДАТЕЛ НА РЕПУБЛИКА МАКЕДОНИЈА, ние МАКЕДОНЦИТЕ ви стоиме на располагање во одбрана на нашата татковина!“
ЦИВИЛ објави повик до граѓанските новинарки и новинари да испраќаат прилози во кои ќе се документира и разобличи говорот на омразата, но ги повика и институциите на соодветна реакција:
„Прилозите во кои се документира говорот на омразата ќе бидат објавувани на медиумската платформа на ЦИВИЛ, но воедно ќе се алармираат и соодветните институции со барање да се санкционира ваквото однесување. Исто така, организацијата ќе ги алармира институциите и јавноста за експлицитниот говор на омраза на дел од јавните настани (протести) во овој период и ќе побара да бидат преземени соодветни законски мерки против организаторите на овие настани и против лицата кои шират говор на омраза и повикуваат на насилство. Драгоцен е придонесот на граѓанските новинарки и новинари во овој наш заеднички напор да му помогнеме на нашето општество да заздрави.“ – се вели во денешното соопштение на ЦИВИЛ.
Џ.Д.
