Градоначалникот на Велес, Аце Коцевски, учествуваше на работната средба „Заедниците против насилниот екстремизам“, што ЦИВИЛ ја организираше со цел јакнење на отпорноста на локалните заедници против насилниот екстремизам, преку формирање на работни групи во заедниците, граѓанска едукација и јакнење на јавната свест.
Koцевски истакна дека добро е тоа што живееме во глобализиран свет, меѓутоа тоа носи и предизвици како што е национализмот, шовинизмот кое потоа тоа раѓа и насилен екстремизам.
„Подобро е да се спречи отколку да се лечи. Во Велес нема некој масовен ектремизам, има некои благи појави кои најчесто се случуваат преку злоупотреба на социланите мрежи“.
Тој се осврна на конфликтната 2001 година кога бил градоначалник и кога во тој период имаше злоупотреба на посебната единица „Лавови“ кои со рафални истрели ги плашеа жителите на неколку албански села.
„Тогаш ми се јави претседателот на месна заедница на Бузелково, кој сега е советник во општината Велес, и веднаш се упатив таму и ситуацијата се смири. За жал тогаш почина едно младо момче од залутан куршум“, рече тој.
Коцевски додаде дека за време на изборната кампања за локолните избори добивал закани по неговиот живот и кон неговото семејство. Тој додаде дека полицијата успеа да го пронајде заканувачот, кој всушност беше едно малолетно момче кое потоа со неговите родители дојде во неговата канцеларија да му се извини.
„Јас му простив и нема да водам судска постапка против него. Добро е што тој се освести дека згрешил и во иднина нема да го стори истото дело“, нагласи тој.
Првиот човек на општина Велес истакна дека сите заедно треба да работат на едукација, образование и соживот кај младите и само така нема да има говор на омраза и насилство, особено на спортските натпревари.
„Луѓето треба да се делат само на добри и недобри на чесни и нечесни, а не според нивната етничка национална и верска припадност“, потенцираше Коцевски.
ЦИВИЛ го спроведува проектот „Заедниците против насилниот екстремизам“ со поддршка од Амбасадата на САД во Скопје.
Дехран Муратов
Монтажа: Биљана Јордановска