Премиерот Димитар Ковачевски во интервју за ‘360 степени’ изрази задоволство од лидерската средба со претседателот на ВМРО – ДПМНЕ Мицкоски.
-Ја оценив како потребна и како средба која што даде добри резултати. Зошто? Бидејќи сите можевме да се увериме дека после средбата во изјава дадена за медиумите која што сите можеа да ја проследат, ВМРО – ДПМНЕ го промени својот став и поддржува уставни измени кои што уставни измени значат вклучување на други народи во Преамбулата на нашиот Устав, вклучително и на делови од бугарскиот народ. И тоа е промена на позицијата која што ВМРО – ДПМНЕ ја имаше. Второ, при подготовката за таа лидерска средба, јас и на прес – конференција го кажав, дека гледајќи го дискурсот кој што го имаше ВМРО – ДПМНЕ сфатив дека тие сакаат да бидат дел од власта, дел од од процесот, и сметам дека треба да се понуди едно широко обединување на македонската поличка сцена, бидејќи овој процес на евроинтеграции е широк, општествен процес, на целото општество, за сите граѓани, кажа Ковачевски.
Тој додаде дека затоа понудил ВМРО – ДПМНЕ да биде дел од Владата.
-Прво да го отвориме Уставот со две третини сите заедно, ВМРО – ДПМНЕ да влезе во Владата и тоа 50% од министерските места кои што ги има СДСМ да ги отстапи на ВМРО – ДПМНЕ, сметаме дека тоа е најфер, братски, пола – пола, за да може да види народот дека се работи за искрена намера бидејќи јас сум кажал многу пати, ова не е борба за власт, ова не е борба за политички поени, ова не е борба за рејтинг до избори, туку ова е практично, работа за носење на одлука која што ќе овозможи Северна Македонија да го продолжи својот европски пат и до 2030 година да станеме земја членка на ЕУ. И дополнително, што е исклучително важно и условот кој што го имаше претседателот на ВМРО – ДПМНЕ, да во таа Влада од нему познати причини, не учествува партијата ДУИ, исто така беше прифатен на самата прес – конференција преку соопштение на портпаролот на ДУИ од самата партија. Со тоа сметам дека сите барања кои што беа поставени, во текот на целиот изминат период,се исполнети во делот на опозицијата, тие го сменија својот став и дури, со оглед на тоа дека процедурата овозможува, уставните измени кои што ќе се направат да важат од моментот на одржувањето на втората меѓувладина конференција, рече Ковачевски.