Премиерот Димитар Ковачевски во рамки на посетата на Атина, по повод 20-годишнината од „Декларацијата од Солун“ на Самитот ЕУ-Западен Балкан, оствари средба со претседателката на Европската комисија, Урсула Фон дер Лајен.
На средбата, беа разменети мислења за најновиот развој на настаните во контекст на отпочнувањето на процесот на уставни измени, за кои земјата ја има поддршката на ЕУ со цел продолжување на процесот на европска интеграција на Северна Македонија. Истакната е важноста на успешното завршување на процесот на уставни измени за натамошниот тек на процесот на европско интегрирање на земјата, се наведува во соопштението на владината прес-служба.
Премиерот Ковачевски и претседателката на ЕК, Фон дер Лајен, разменија мислења за текот на скрининг процесот и очекуваното отворање на првите кластери од преговорите.
Двајцата соговорници се осврнаа на придобивките за земјите од Западен Балкан од новиот план за раст на Фон дер Лајен, како што се приближувањето до единствениот пазар на ЕУ и продлабочувањето на регионалната економска интеграција, кои се исклучително важни за секоја од земјите.
Клучно за земјите од Западен Балкан е да се забрзаат фундаменталните реформи, за што ЕУ ќе ги зголеми претпристапните средства за земјите од регионот, се додава во соопштението.
Говорејќи за предностите на членството во ЕУ, уште еднаш е потенцирано дека е од клучна важност да не се пропушти оваа шанса за членство на Северна Македонија во Унијата.
На средбата се разговарало и за состојбите и перспективите на земјите во регионот на Западен Балкан, чија евроинтеграција има геостратешка и безбедносна важност за цела Европа.