Премиерот Димиртар Ковачевски смета дека сега не е време за предвремени парламентарни избори, туку е време за справување со здравствената и енергетската криза, и за развој на економијата. Избори ќе има, вели, ама редовни, во 2024 година, до кога сите политички партии имаат време да постигнат консензус за укинувањето на „пржинската влада“, пренесува МИА.
-Во однос на прашањата што беа отворени во изминатиот период доминантно од опозицијата, ние како партија и јас како претседател на СДСМ и претседател на Владата веќе дадовме став дека во моментов државата се соочува со неколку големи предизвици, а тоа е прво справувањето со здравствената криза, справувањето со енергетската криза. Имавме и справување со топлинската криза во Градот Скопје, а исто така имаме и отворен процес, активен, на разговори со нашиот сосед со Република Бугарија а со цел одржување на прва меѓувладина конференција на Република Северна Македонија со ЕУ. Оттаму сметаме дека оние прашања коишто не се во насока на исправување со најголемите предизвици само претставуваат дефокусирање од оние проблеми коишто се најважни да се решат за нашите граѓани, изјави Ковачевски во одговор на новинарско прашање.
Според него, самото барање на опозицијата за укинување на „пржинската влада“ потврдува дека во државата има демократски амбиент, каков немало во времето кога е воведена таа влада, што, како што истакна, значи дека во тоа време имало заробена држава во која администрацијата и државниот апарат биле користени во партиски изборни цели.
-Медиумите не беа оставени слободно да ја извршуваат својата работа, а денеска сите медиуми им се достапни на сите политички репрезенти било да се од позицијата, било да се од опозицијата и тоа само потврдува за тоа дека СДСМ и Владата и неговите коалициони партнери ги имаат вратено демократските принципи на владеење. Со оглед на тоа што „пржинската влада“ е договорена помеѓу четирите најголеми партии тоа значи дека и начинот на нејзиното укинување треба да се направи на истиот начин, а не со еднострано барање од една политичка партија притоа имајќи во предвид дека имаше и изјава од страна на коалицискиот партнер на ВМРО-ДПМНЕ, односно Алијанса дека тие имаат друг поглед на тоа прашање. Од таа причина, треба работни групи да седнат и да договорат решение кое што решение ќе биде дел од Закон за Влада и кое што ќе важи за изборите 2024 година, рече Ковачевски.
Во врска со прашањето за една изборна единица, тој истакна, дека СДСМ како партија е за вакво решение, но, како што нагласи, измените на Изборниот законик со кој се регулира ова прашање, секогаш се носеле со консензус на партиите.
-Ние сме политичка партија која што прва го поддржа концептот на една изборна единица и преку тоа го поддржавме и барањето на помалите политички партии кои се дел од коалицијата заедно со СДСМ. Но, веќе видовте дека дел од политичките партии излегоа со свое гледање за тоа како треба да изгледа изборниот модел. Јас имам свој личен став во однос на правење на изборни модели, а тоа е дека тие мора да бидат правени низ широка расправа преку работни групи кои ќе вклучуваат претставници на политичките партии, на ресорните министерства задолжени за изготвување на изборниот закон, како и експерти, вклучително и експерти од ОБСЕ/ОДИХР, рече премиерот.
На таков начин, додаде тој, ќе дојде до Изборен законик кој на најдобар начин ќе ги отсликува прво заложбите на политичките партии во државата, потоа барањата на граѓаните, но и ќе може да гарантира фер изборен натпревар и резултати. Со оглед на тоа што, како што нагласи избори ќе има во 2024, има доволно време да се формираат работни групи кои ќе работат на ова решение.
Премиерот Ковечевски најави дека денеска ќе присуствува на Економско-социјалниот совет на кој, како што рече, се надева дека заедно со работодавачите и синдикатите ќе изнајдат решение кое биде на задоволство на вработените.
– Во неколку наврати имам кажано дека сум на страната на вработените. Тоа јасно го кажав и при изгласувањето на законското решение за недела неработен ден бидејќи во еден дел работодавачите имаа поднесено иницијатива за оценка на уставноста на тоа законско решение. Тогаш јасно кажав дека сум на страната на вработените. Секој вработен има право недела да ја помине со своето семејство и тоа јасно го кажав на состанокот со Стопанската комора и се договоривме низ разговор, кој ќе трае 30 дена, да се најде решение кое ќе биде бенефит за работниците и таа иницијатива да биде повлечена од Уставниот суд. Денес имаме 92 проценти од вработените на кои недела им е неработен ден, истакна Ковачевски.
Одговарајќи на новинарски прашања при денешната посета на Штип, Ковачевски не сакаше да калкулира со бројки за минималната плата, бидејќи, како што рече, никогаш не соопштува бројки кои не се базираат на анализа и кои не се договорено меѓу социјалните партнери.
– Местото каде тоа треба да биде кажано е ЕСС и таму треба да биде кажано и договорено од страна на сите социјални партнери. Во ЕСС имаме претставници на работниците кои заслужуваат да им се вредува трудот, но тука се и работодавачлите чие мислење треба да се слушне бидејќи минималната плата секогаш е поврзана со зголемувањето на продуктивноста на трудот, изјави Ковачевски, додавајќи дека негов личен став е дека платите треба да растат.
Пред денешниот Економско-социјален совет, седница треба да одржи Економскиот совет на Владата со кој ќе заседава премиерот Ковачевски.
– Разговорите на ниво на министерства за надворешни работи очекувам да бидат во духот на европските вредности, со почитување на двете држави и на достоинството на граѓаните и на Република Северна Македонија и на Република Бугарија, изјави денеска премиерот Ковачевски, одговарајќи на новинарско прашање за овонеделната средба на ниво на МНР со Бугарија.
Ковачевски, посочи дека професионалци од МНР-та од двете страни ќе работат на изнаоѓање решенија за отворените политички прашања врз меѓународни стандарди кои потоа ќе бидат споделени и со јавноста.
– Кога ќе имаат резултати во однос на нивните разговори кои ќе бидат на ниво да може да се смета дека се прифатливи, тогаш нормално дека и владите ќе ги разгледуваат, а ќе бидат споделени и со јавноста низ процедура и со институциите задолжени за нивно разгледување и евентуално усвојување, изјави премиерот Димитар Ковачевски, одговарајќи на новинарски прашања по денешната посета на ТИРЗ Штип.
Ковачевски, исто така, рече дека во однос на разговорите со Бугарија отворен е нов процес на разговори, кој се темели на прашања кои се однесуваат на реални теми кои практично ги афектираат сите граѓани и сите општествени процеси во двете држави.
– За таа цел после двете средби кои ги имавме со бугарскиот премиер и заедничката владина седница во Софија, беа договорени работни групи, во областа на економијата, инфраструктурата, образованието и културата, европските интеграции, нормално и Историската комисија продолжи да работи и тогаш рековме дека министерствата за надвореши работи на двете држави ќе работат на изнаоѓање решенија за политичките прашања кои се отворени меѓу двете држави, изјави Коавчевски.
