Собранието на Република Македонија со 94 гласа „за“ го продолжи рокот на важењето на кризна состојба на северната и на јужната граница на земјата, до 31 декември 2017 година.
Министерот за внатрешни работи, Оливер Спасовски, рече дека одлуката е значајна и дека рокот се продолжува врз основа на проценките на надлежните служби. Според него, мигрантската криза може да ескалира во секој момент. Неодамна, за време на посетата на јужната граница, Спасовски изјави дека Maкедонија нема да гради нови бегалски кампови и дека двата кампа кои се транзитни се сосема доволни, доколку има нов бран бегалци. Ставот на Владата е во овие кампови да се прифатат бегалците и да се транспортираат во други држави од Балканската рута.
Во меѓувреме, предвидувањата за нов бран бегалци станаа реалност. Откако беше затворена Балканската рута пред една година, Црвениот крст на Град Скопје згрижил над 3.000 бегалци. Најголемиот дел од нив ги користат планинските патишта во близина на српската граница, за оттаму да стигнат до земјите од Западна Европа. Но, во изминатите неколу месеци, се забележува и голем проток на мигранти во обратна насока. Групи бегалци и мигранти се враќаат назад од Србија, преку Македонија, кон Грција, каде бараат алтернатива за влез од Балканот. Тие се движат по црните патишта низ Липковскиот регион до јужниот дел од Македонија. Четири мобилни тимови на Црвениот крст се задолжени за згрижување на овие групи бегалци.
Турција е земјата со најголем број на бегалци во светот, чија бројка достигна над 3,2 милиони! Околу 90 проценти од сириските бегалци во Турција остануваат надвор од транзитните центри, со ограничен пристап до основните потреби. Европската комисија обезбедува хуманитарна помош за ранливите бегалци, особено за оние кои живеат надвор од центрите и камповите, но таа – едноставно, не е доволна.
Една од мерките кои во моментов ја користат околу половина милион бегалци, е иновативна програма за итна социјална сигурност за најранливите бегалски семејства за покривање на основните потреби, како што се храна, кирија, медицина и облека. Програмата обезбедува 100 турски лири (околу 26 евра) за секој член на ранливите семејства за еден месец!
Подготви: М. Ивановска
