Конференцијата „Моќта на културата и уметноста за општествени промени“, на едно место ги собра луѓето кои активно работат на полето на културата, и оние кои преку културниот активизам се борат да внесат промени во општеството.
Дали заробените институции и украдените јавни простори се доволен поттик за да се создаде креативен отпор и протест? Кои се границите на соработка на независниот културен граѓански сектор со власта и дали при таквите соработки постои опасност од губење на критичноста? Ова се мал дел од прашањата на кои културни работници, граѓански активисти и експерти се обидоа да дадат одговор и свое видување на првиот ден од конференцијата „Неискористената моќ на уметноста и културата за општествени промени”.
Членката на управниот одбор на ФООМ и активистка Мерита Максути, истакна дека ФООМ во изминатите 25 години одигра исклучително важна улога во промовирање и поттикнување на општествената одговорност работејќи на фронтот на културата, човековите права и социјалните промени, како фундамент за функционално општество.
„Ние пред извесно време излеговме од еден период каде гласот на креативниот отпор, реакција или протест беше потиснат, а просторот за делување екстремно намален. Ние сите носиме општествена одговорност и секој од нас има различен капацитет за конфронтација со неправдите и тоа што треба да се промени во општеството, а особено ќе ставам акцент на уметниците, активистите и креативната маса на општеството. Искрено се надевам дека нашиот капацитет нема да се намали само со промената која настана во нашето општество“ – рече Максути.
Покрај Максути, на конференцијата учествуваа и Никола Гелевски од издавачката куќа „Темплум“, Славчо Димитров од коалиција „Маргини“, претставнички на активистичката група „Хавеит“ од Приштина, Хана Квена и Алкета Силај и Бесфорт Идризи од Детскиот театарски центар во Скопје.
За уметничкиот активизам говореа и Стив Ламбер, концептуален уметник и придружен професор за нови медиуми од САД, професорот Небојша Вилиќ од Факултетот за драмски уметности во Скопје, Оливер Реслер, уметник и филмски работник од Австрија и уметницата Христина Ивановска.
Денеска ќе се одржат и две работилници, едната е на „Хавеит“ од Косово, а другата со концептуалниот уметник Стив Ламберт од САД.
Конференцијата ја организираше Фондацијата Отворено општество – Македонија, во рамките на програмата за одбележување на 25 годишнината од почетокот со работа во земјава.