Рускиот министер за надворешни работи Сергеј Лавров ги повика САД „да не си играат со оган“ во Сирија и да прават одмерени чекори во врска со сирискиот народ и регионот во целина.
Лавров ова го изјави на отворањето на конференцијата на Меѓународниот дебатен клуб „Валдаи“ насловена „Русија на Блискиот исток: Игра на сите полиња“.
– Уште еднаш ги повикувам нашите американски колеги да не си играат со оган и да прават одмерени чекори, не врз основа на непосредни потреби на политичкото опкружување, туку пред се врз основа на долгорочни интереси на сирискиот народ и сите народи во регионот, вклучувајќи ги и Курдите, се разбира, рече Лавров.
Тој нагласи дека Русија со стравување ги гледа обидите на САД да ги остварат „плановите за поделба на Сирија“, додавајќи дека тие стравувања се поради акциите на Вашингтон на поширока сириска територија источно од реката Еуфрат до границите со Ирак и Турција.
Лавров ги нарече обиди за шпекулација медиумските написи за смртта на стотици руски платеници во војната во Сирија.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
