На денешниот самит во јапонскиот град Хирошима, лидерите на групата Г7 ја потврдија поддршката за Украина против руската агресија, а на состанокот се приклучи и украинскиот претседател Володимир Зеленски, кој се сретна со американскиот претседател Џо Бајден.
Лидерите на Г7, група која ги вклучува САД, Јапонија, Германија, Велика Британија, Франција, Италија и Канада, викендов на самитот во Хирошима испратија јасна порака до Русија за нивната силна поддршка за Украина, објавија западните медиуми.
На средбата со украинскиот претседател, Бајден најави испорака на ново оружје и муниција за Кијив. Тој најави нов пакет воена помош за Украина од 375 милиони долари.
Новата испорака ќе вклучува „муниција, артилерија, оклопни возила“, рече Бајден, кој пред неколку дена ја поддржа обуката на украинските пилоти да летаат со авиони Ф-16.
Иако германскиот канцелар Олаф Шолц не очекува, како што рече, наскоро да и бидат испорачани модерни борбени авиони на Украина, тој нагласи дека планот за обука на пилоти ја покажува посветеноста на Западот кон Украина. САД сè уште не одлучиле конечно „што ќе биде на крајот од обуката“, истакна Шолц.
Проектот првенствено е порака до оние кои ја нападнаа Украина: Русија не треба да се коцка дека поддршката за Украина ќе се намалува како што војната продолжува. Пораката останува: Русија мора да ги повлече своите сили, посочи Шолц.
Канадскиот премиер Џастин Трудо на прес-конференција изјави дека Канада ќе го поддржува Кијив се додека е потребно. Исто така, ќе продолжи да ги обучува украинските војници, како што го прави тоа од 2015 година, а можеби и пилоти, рече Трудо.
Британскиот премиер Риши Сунак изјави дека неговата земја ќе започне со обука на пилоти ова лето.
Тој рече дека никој не сака мир повеќе од украинскиот претседател, но дека условите за мир мора да се засноваат на принципите на Кијив.
Зеленски на Телеграм напиша дека на самитот им го претставил мировниот план на лидерите на Г7.
Ние го развивме мировниот форум за да обезбедиме секоја негова точка да биде поддржана во резолуциите на ОН. За да може секој во светот да избере цел што може да помогне да се постигне. Од Јапонија до арапските земји, од Европа до Латинска Америка, наоѓаме поддршка за формулата за мир. И ја продолжуваме оваа работа, напиша украинскиот претседател.
Според неговото верување, светот има доволно сила да ја принуди Русија чекор по чекор да воспостави мир, а Украина му понуди формула за мир.
Во својот говор на Г7, чиј текст беше објавен на претседателската веб-страница, тој рече: „Не обединува уште еден принцип – рационалноста“. „Украинската формула за мир е очигледен израз на рационалност. Ви благодарам што ја поддржавте нашата формула.
Францускиот претседател Емануел Макрон изрази надеж дека присуството на украинскиот претседател на собирот на седумте водечки индустриски земји (Г7) во Јапонија ќе им помогне на земјите како Бразил и Индија подобро да ја разберат ситуацијата во Украина.
Коментирајќи го фактот дека авионот на француската влада го однел Зеленски на состанокот на Арапската лига во Саудиска Арабија пред да го донесе во Хирошима, Макрон рече дека станува збор за градење мир и барање решение.
Во интерес на Франција и нејзината улога како постојана членка на Советот за безбедност на ОН беше да му дозволи на Зеленски да зборува пред неколку светски сили кои понекогаш се изложени на само еден дискурс, изјави Макрон за новинарите на маргините на самитот.
Г. Т.
