Немилиот нстанот во Прилеп и изложеноста на социјалните работници на предизвици додека ги вршат своите работни задачи, беа некои од темите на денешниот работен состанок на министерот за социјална политика, демографија и млади, Фатмир Лимани и неговиот заменик Ѓоко Велковски со директорите на центрите за социјална работа и установите за социјална заштита.
На состанокот, како што информира Министерството за социјална политика, демографија и млади, стана збор и за подобрување на условите за работа, плановите за реновирање на центрите, потребата од нови вработувања, раст на платите во социјалната заштита и имплементација на SWIS системот.
Министерот Лимани посочи дека ваквиот тип состаноци ќе станат редовна пракса, но ќе се организираат и редовни посети на центрите за социјална работа и установите за заеднички да се разгледаат тековните предизвици со кои се соочуваат институциите од социјална заштита, да се разменат искуства и да се договорат конкретни чекори за подобрување на системот.
-Постапката за физичко обезбедување е во крајна фаза. Социјалните работници се двигатели на промените во општеството и нивната улога е неприкосновена. Министерството стои на располагање за целосна поддршка и соработка со цел заедно да креираме политики и мерки кои ќе обезбедат поквалитетни социјални услуги за граѓаните, но и задоволни и мотивирани вработени, порача Лимани.
фото: Министерство за социјална политика, демографија и млади
