Само 34 отсто од Индексот на отвореност исполнуваат општините во Македонија, а дури 2/3 не го објавуваат Планот за јавни набавки за тековната година, покажува истражувањето за степенот на отвореност на институциите, како дел од проектот „Актион СЕЕ“ што го спроведува Фондацијата за интернет и општество, „Метаморфозис“.
„Во однос на принципите транспарентност, достапност, интегритет и ефективност, по кои е правено истражувањето, исполнувањето на индикаторите за достапност од општините е на најниско ниво, односно, општините исполнуваат само 27% од индикаторите, кои се однесуваат на обезбедување и почитување на постапките за слободен пристап до информации и зајакнување на интеракцијата со граѓаните“, се вели во анализата од истражувањето.
Како што истакнуваат од „Метморфозис“, податокот за 0% исполнување на индикаторите од поткатегоријата „јавни набавки“ од 11 општини е загрижувачки, и отвора сомнеж дека се можни злоупотреби и корупциски дејствија во набавките, со што слабее довербата на граѓаните во избраните претставници.
„На ниското исполнување на индексот на достапност од општините, влијае и нивната недоволна интеракција со граѓаните преку социјалните мрежи, необјавувањето на месечни информатори за граѓаните за работата на општините, како и недостатокот на јавни дебати за граѓаните – за прашања од локално значење, необјавувањето на планови за јавни консултации со граѓаните за општинските политики и на записниците од одржани средби со граѓаните“, велат од „Метаморфозис“.
„Индексот на транспарентност, во поткатегоријата ‘транспарентност на буџетите’, општините го исполнуваат со 49 отсто. Голем дел од општините ги објавуваат донесените буџети и завршните сметки, но во заштитени ПДФ-формати, што ги прави тешко пребарливи. Исто така, на процентот на исполнувањето на индексот, влијае необјавувањето на граѓанските буџети од општините, како полугодишните извештаи за трошењето на буџетот“, се вели во анализата.
Дополнително, во последниот извештај на Европската комисија за оценување на прогресот на Македонија за пристапување во Унијата, забележано е дека локалните власти континуирано покажуваат недостаток на капацитети за соработка со граѓанските организации.
Истражувањето се спроведуваше во 144 општини од шест земји од Западен Балкан кои пополнуваа прашалник со над 60 индикатори по општина.
