Во поглед на сивата економија имаме предизвици, што значи дека ќе имаме и нови проекти во оваа насока, рече директорката на УЈП Сања Лукаревска за време на годишната конференција „Година на нови можности“.
-Еден од најголемите проекти е „е-фактура“, што е ризик фактор кај најголемите даночни обврзинии. Тоа ќе значи намалување на фиктивните фактури и претставувањето лажна слика преку документација на обврзниците кои ја даваат пред УЈП, рече Лукаревска.
Таа рече дека за овој проект треба поголем период на тест фаза, за да може даночните обврзници да се навикнат на овој проект.
-Паралелно се трудиме да воведеме и е-фискализација. Со тоа, ќе овозможиме да се направи даночен информациски систем, проект кој ќе биде дел од интегриран информациски ситем за управување со јавните финансии, истакна директорката на УЈП.
Таа кажа дека во борбата со сивата економија придонесуваат и договорите потпишани преку „Отворен Балкан“ за размена на податоци, бидејќи полесно се откриваат фирмите со неколку седишта кои затајуваат данок.
Успешната наплата на приходите на УЈП е во зависност од сите општествени текови, а колку поуспешно УЈП го полни буџетот, секоја година се повисок план се добива од Министерството за финансии. Тоа е за нас предизвик, а не пречка, рече Лукаревска.
Таа додаде дека „бројките на наплата се на наша страна“, но потенцира дека уште повеќе средства може да се соберат, а тоа е поврзано со законските услови, борбата со сивата економија, но и дигитализација на процесите.
– Ланската година имаме наплата на 104 милијарди денари, тоа е 17% повеќе од 2021 година. Имаме раст во делот на данок на добивка, 45% повеќе од 2021, потоа 16% повеќе данок на личен доход, што се базира на вееќ пополнетата даночна годишна пријава, преку е-пдд системот, рече Лукаревска.
Таа информира дека има поголема наплата и на ДДВ, за 11,3% во споредба со 2021 година.
