Љуљзим Џемаили, директор на студентскиот дом „Томе Стефановски – Сениќ“, во текот на интервјуто со Љавдие Калеши, изрази желба за ЦИВИЛ Медиа, да ја раскаже и својата страна од приказната.
На обвинувањата дека ги бркал жените сместени во домот по поплавите, и им нудел недостоинствени услови за престој во други простории, Џемаили одговори дека тој направил сè што е неопходно за трите жени кои живеат во домот од минатата година.
Џемаили тврди дека е неправедно обвинет од Љавдие Калеши, која со нејзината мајка и со уште една постара жена за која се грижи, живеат во домот скоро една година. Реновирањето на студентскиот дом мора да завржи до почетокот на учебната година, а тој како директор нема никакви ингеренции за нивниот случај.
Џемаили ги посочи Владата и Министерството за труд и социјална политика, како институции кои од почетокот се одговорни за лицата што настрадаа во поплавите.
„Ние направивме сè за нив, и не сме ги оставиле на улица! За да ги ‘бришам’, за да ги избркам, секогаш имам услови… Се јавија од сите страни и им потенцирав дека не се оставени на улица, понудени им се простории со услови, но не сакаат да излезат. Моите работни активности никој не може да ги спречи!“, изјави Џемаили за ЦИВИЛ Медиа, на прашањето колку има вистина во изјавата на Келеши дека се заканил принудно да ги исели со полиција.
Од Министерството за труд и социјална политика изјавија дека се запознаени со случајот, но и дека не се надлежни.
Министерството за образование и наука се заложило на лицата што престојуваат во студентскиот дом да им се продолжи рокот за престој, зашто, трите „жителки“ требаа да го напуштат до 15 јули.
„Известени сме за случајот. На наше барање, од домот добивме одговор дека поради градежни работи, на луѓето им се понудени други простории за престој. Ги прашавме дали станува збор за иселување, и ни одговорија дека само ќе бидат преместени“, изјави за ЦИВИЛ Медиа, Владимир Дејлов од Министерството за образование. Според него, доколку од 1 септември нема услови за престој до домот, решавањето на нивниот статус се враќа во ингеренциите на Министерството за труд и социјална политика.
Биљана Јордановска
Камера: Дехран Муратов
