„Причините што Македонија се наоѓа меѓу првите држави на листата на најзагадени градови се очигледни, иако сé уште немаме точни, детални, национални информации за загаденоста на воздухот. Веќе четири години имаме масовна сеча на шумите низ државата, уништување на урбаното зеленило, како и делумно игнорирање на загаденоста на воздухот, со ширење на популистички и површни совети за заштита. Најавите за конретни мерки се одлагаат и најавуваат постојано, но никој досега од властите не признал одговорност за проблемот. За тоа се обвинуваат граѓаните и нивниот избор на греење, а не се бара ревизија на Националната стратегија за енергетика, намалување на сечата…“, вели во разговорот за ЦИВИЛ Медиа, екологот и активист Кирил Арсовски Пржо, откако организација „Еко Експертс“ објави мапа на држави со најзагаден воздух. Од 135 рангирани земји во светот, Македонија е на 17-то место според аерозагадувањето. Истражувањето се базира на податоци од Меѓународната агенција за енергетика и Светската здравствена организација.
Во разговорот Арсовски се осврнува и на организацијата која го спроведува истражувањето.
„Актуелното истражување околу токсичноста во земјите од светот е спроведено од ‘Eко Експертс’ (The Eco Experts), што е всушност, британска компанија за производство на соларни панели, и преку истражувањето, технички се обидува да ги промовира своите услуги, и со тоа да го промовира овој начин на добивање на енерргија. Со оглед на фактот дека Обединетото Кралство субвенционира соларна енергија, ова е очекувано. Во истражувањето, државите се рангирани според: потрошувачка на енергија, емисија на јаглерод диоксид, загадување на воздухот, жртви од загаден воздух и количество на енергија добиена од обновливи ресурси. Покрај Македонија, меѓу првите на таа листа се високо развиените држави од Блискиот Исток кои поради нивниот развој имаат огромна потрошувачка на енергија“, вели тој.
Од регионот заедно со Македонија, и Бугарија(13) и Босна и Херцеговина(14) се високо на листата на држави со најзагаден воздух во светот. Според податоците на Институтот за јавно здравје, во Македонија годишно од загаден воздух умираат 1.300 лица.
Марија Теговска
