Во обраќање на свечениот настан по повод 15-годишнината од основањето на Академијата за судии и јавни обвинители, министерот за правда, Бојан Маричиќ се осврна на важноста и значењето на Академијата, како и на заложбите што Министерството за правда и Владата ги прават за нејзин развој и усовршување преку реформата во правосудниот систем, соопштија од Министерството за правда.
„Тука Академијата ја игра најважната улога. Таа е „храм на образованието во правосудниот систем“, изворот на квалитетни и стручни судии и јавни обвинители и единствена гаранција дека во правосудството ќе влезат најдобрите кадри. Но, може да се каже и дека е појдовна точка за целокупниот правосуден систем со значајна улога на чувар на достоинството и кредибилитетот на судиите и јавните обвинители“, изстакна министерот Маричиќ во обраќањето.
Тој потенцираше дека измените и дополнувањата на Законот за Академија на судиите и јавните обвинители се во насока на исполнување на заложбата и ангажманот на Владата и Министерството за правда во процесот на креирање на независен, непристрасен и ефикасен правосуден систем кој одговара на европските стандарди.
„Академијата и понатаму останува единствена точка за влез во судството и јавното обвинителството, каде судиите и јавните обвинители во континуитет добиваат стручно усовршување на теоретските и практичните знаења според однапред подготвени програми, дизајнирани според потребите на целните групи. Ова е формулата која носи квалитет во правосудниот систем и продуцира кадри на судии и обвинители кои покрај домашното законодавство, ја знаат и применуваат Европската Конвенција за човекови права и слободи, законодавството на ЕУ и други меѓународни стандарди“, посочи Маричиќ, кој честиташе за досегашната работа на Академијата и посака да продолжи посветено работи и понатаму заради квалитетот на идните генерации на судии и јавни обвинители, заштита на професијата, граѓаните, но и заради напредокот на државата која, како што посочи министерот, одлучно работи на европската агенда.
Академијата на Маричиќ му додели Благодарница за неговиот ангажман и придонес како министер за правда во развојот на Академијата, соопшти Министерството за правда.
Ц.Д
