пишува: БИЉАНА ЈОРДАНОВСКА
Во Брисел, Министерот за правда, Бојан Маричиќ промовира вредности што карактеризираат една демократска земја, па зошто да не во блиска иднина и европска, што ќе рече – членка на ЕУ. И додека тој пред европратениците говори за владеење на правото, борба против криминалот и корупцијата, зајакнување на одговорноста, за капацитетите и напорите за реформите во правосудството во нашата земја, некој во домовината „се лепи и се разлева“ по шофершајбните повикувајќи на бојкот на пописот и прави кривично дело.
И тоа некој, не е никој друг, туку некој што зема пари од буџетот на даночните обврзници на Северна Македонија, организиран е во политичка партија и окупира две седишта во македонскиот законодавен дом.
И сега треба да се зборува за правниот поредок, кој подразбира некорумпирани, некриминализирани и одговорни политички структури кои се должни да се грижат за спроведување на правото и правдата. Тогаш, што го кочи Основното јавно обвинителство да одговори на просто прашање: Дали отворениот повик и јавната онлајн и теренска кампања преку делење на летоци за бојкот на пописот на политичката партија Левица претставува кривично дело?
Очигледно некој треба да одговори, но колку тоа е во надлежност на Владата? На прес-конференција од Влада одговорија дека повикувањето на бојкот на пописот е кривично дело според член 387 од Кривичниот законик: парична казна или затворска казна до три години за оние што ќе организираат други на отпор или на непослушност спрема законити одлуки или мерки на државен орган, а сторителот, повикувачот на отпор, пак, ќе се казни со затвор од една до пет години.
Во случајот на тој „некој“, партијата би добила парична казна (болна точка на лидерот на тој „некој“), а правниот застапник на партијата треба да добие затворска казна?
До ОЈО е пратено дополнително прашање што, исто така, нема одговор, дали ја проследиле изјавата на Владата и дали навистина станува збор за кривично дело и што тие ќе преземат. Одговор нема.
Можеби капацитетите на ОЈО се целосно насочени кој претрес на имотот на Никола Груевски, уште еден правен преседан, за „мир во куќа“, па немаат доволно ресурси да отворат и проверат закон и одвојат 5 минути за одговор на прашање за случај, што има реална основа да биде антидржавно и антидемократско дејствување.
Можеби некои не ја сфаќаат сериозноста дека ваквиот чин на повикување на бојкот против законити одлуки или мерки на државен орган, а такви се и акцијата за собирање на потписи против пописот што ја започна Мицкоски, па и на маргиналците собрани околу Јанко Бачев. Но сето тоа може реално да ја отежнат работата на попишувачите. Можеби тие се тука само за политизирање на пописот, што не е ништо чудно и ново со воспоставената пракса на политизирање на сѐ и сешто.
И додека скоро сите релевантни политички претставници на сите етнички заедници го промовираат пописот и придобивките од него, „здружената“ десница во земјата решила да собира политички поени под лошото образложение дека пописот е обид да се „демакедонизира“ граѓанството.
Убава и секако значајна е промоцијата на реформите во Брисел, но грди се шофершајбните на кои се „залепија“ бојкотирачите со хаштагот „Не отворам врата“. Уште погрд е молкот на носителите на правда во државата.
Сите права се задржани. ЛИНК: Услови за користење, авторски права и заштита на приватноста. Текстот е личен став на Авторот.
