ЦИВИЛ – Центар за слобода и Општина Велес денеска потпишаа Меморандум за соработка во спречување, односно превенција од насилниот екстремизам.
Градоначалникот на Велес, Аце Коцевски, изјави дека ова е уште една потврда на отвореноста на општината да придонесе во борбата против насилниот екстремизам.
„Се надевам дека со тоа што потпишуваме Меморандум за партнерство и соработка, правиме добро дело и дека резутлатите ќе го покажат тоа во наредниот период. Верувам дека заедно ќе успееме во соработка со претставниците на сите институции што се тука да се спротивставиме на опасностите и на заканиште што со себе ги носи насилниот екстремизам“, изјави Коцевски.
Џабир Дерала, претседател на ЦИВИЛ изрази задоволство што соработката и партнерството продолжува понатаму, а потпишувањето на Меморандумот е првиот чекор кон спроведување на конкретни активности што на локално ниво ќе бидат насочени кон превенција и едукација радикализацијата, насилниот екстремизам и тероризмот.
„Меморандумите за соработка што ги потпишуваме на локално ниво со градоначалниците, вчера со градоначалникот на Куманово, денеска со градоначалникот на Велес и оние што ќе ги потпишеме со градоначалниците на Гази Баба, Чаир, Тетово, скицираат една заедничка мултидисциплинарна активност на граѓанските организации во соработка со локалните власти, полицијата, претставниците од образованието и низа други институции на локално ниво. Целта е рано детектирање на насилниот екстремизам и подобрување на состојбите во доменот на безбедноста и сигурноста“, изјави Дерала за медиумите.
По церемонијалниот дел, се формираше работна група која во наредниот период ќе работи на мапирање можни проблеми што водат кон насилен екстремизам и организирање на јавен настан на кој ќе ги промовираат индикаторите што водат до оваа појава, но и можните решенија за превенција од истиот преку креативни активности.
Настаните се во рамки на проектот „Заедниците против насилниот екстремизам“ кој е поддржан од Американската амбасада во Скопје.
Б. Јордановска
