ВЕСТ НА ДЕНОТ
Михаел Рот на средби со државниот врв во Скопје
Претседателот на Комисијата за надворешни работи на германскиот Бундестаг, Михаел Рот, денеска престојува во посета на Република Северна Македонија.
На средбата меѓу Претседателот Стево Пендаровски и Михаел Рот се разговараше за билатералните односи меѓу Република Северна Македонија и Сојузна Република Германија, кои се карактеризираат со пријателство, исполнети со доверба и взаемно почитување и интензивен политички дијалог.
Претседателот Пендаровски истакна дека Германија која е движечка сила на Европската Унија во Западен Балкан е еден од нашите најблиски сојузници и најсигурни партнери во изминатите 30 години и изрази благодарност што евроинтеграцијата на Република Северна Македонија е висок приоритет на надворешно-политичката агенда на германската влада предводена од канцеларот Шолц.
На средбата се разговараше и за отворањето на пристапните преговори на ЕУ со Северна Македонија и Албанија при што беше посочено дека тие се од суштинско значење во актуелните геополитички и безбедносни околности и во справувањето со влијанијата на руската агресија во Украина.
Рот се сретна и со преседателот на Парламентот на Северна Македонија, Талат Џафери при што нагласи дека неговата посета се реализира како поддршка на следните чекори кои Собранието треба да ги преземе за непречен тек на процесот на преговори за членство во ЕУ, соопшти собраниската прес-служба.
Во соопштението се наведува дека Рот изразил целосно разбирање за фрустрациите и разочараноста од актуелните случувања, потенцирајќи дека ЕУ нема право да се меша во јазичниот и културниот идентитет на Македонците и тоа мора да се почитува.
Вицепремиерот Бојан Маричиќ го информираше Рот за чекорите кои земјава ги презема по прифаќањето на францускиот предлог, како и за претстојната промена на Уставот. Вицепремиерот Маричиќ со пратеникот Рот се согласија дека во процесот на уставни измени е потребно сите политички чинители да застанат зад државниот интерес, со цел процесот на преговори да се одвива непречено.
ИЗЈАВА НА ДЕНОТ
„Добро утро Скопје! Добро е да се вратиш во предизвикувачки, фрустрирачки времиња за Македонците! Но вие никогаш нема да чекорите сами… Надежта е клучот! И патем: Македонскиот е јазик во Европа на културни различности!“, напиша на Твитер, Михаил Рот, пратеникот од германскиот Бундестаг воедно и претседател на тамошната Комисија за надворешна политика.
ФЛЕШ ВЕСТИ
ЗАПАДЕН БАЛКАН Три документи – за соработка во областа на храната, кинематографијата и цивилната заштита, ќе бидат потпишани на претстојниот лидерски самит во Белград кој, како политички дел, ќе се одржи во рамки саемот „Винската Визија на Отворен Балкан“. На самитот ќе учествуваат српскиот претседател Александар Вучиќ, претседателот на Владата на Северна Македонија Димитар Ковачевски и албанскиот премиер Еди Рама.
ДЗР Во однос на вистинито и објективно прикажување на финансиските извештаи и за усогласеноста на финансиските трансакции со релевантната законска регулатива, упатства и воспоставени политики, државните ревизори издаваат „позитивно“ мислење за БЕСА и ГРОМ, „неповолно“ мислење за ДПА, Движењето за национално единство на Турците и Алијансата на Албанците, додека мислење со „резерва“ државните ревизори издаваат за СДСМ, ВМРО-ДПМНЕ и ДУИ.
ХУМАНОСТ Успешно заврши мисијата за привремено сместување на загрозените лица од Авганистан ангажирани од НАТО. Денес, последното осумчлено авганистанско семејство Ахмадзаи претходно ангажирано од НАТО ја напушти Северна Македонија, со што успешно ја заокруживме мисијата за обезбедување привремено сместување на Авганистанците кои во земјава беа преземени од базата “Бехтел” во Косово, објави министерот за надворешни работи, Бујар Османи, на Фејсбук.
ВОЈНА ВО УКРАИНА
Во Лајпциг, Германија, полицијата е во потрага по сторителите кои се обиделе да запалат градинка во која одат украински деца кои избегале од руската агресија во Украина. Инцидентот се случил во саботата на 27 август, откако градинката веќе била затворена, пренесува Укринформ повикувајќи се на Билд.
*
Мисијата на Меѓународната агенција за атомска енергија (МААЕ), која претходно пристигна во Киев, тргна кон нуклеарната централа Запорожје за да ја увиди ситуацијата на терен и да формира постојано претставништво во објектот што остана заземен од руските војници од 4 март, изјави генералниот директор на МААЕ, Маријано Гроси, кој зборуваше на брифингот во Киев во раните утрински часови во средата, јавува дописникот на Укринформ.
*
Во регионот на Доњецк, руските војници изминатиот ден убија четворица цивили, а повредија уште двајца, додека во руските напади во градот Никопол беше повредена е 57-годишна жена, пренесува Укринформ.
*
Популацијата на Русија постојано се намалува како резултат на лошата здравствена заштита, алкохолизмот, хроничниот стрес и сиромаштијата, наведува украинскиот Центар за стратешка комуникација и информациска безбедност (ЦСКИС) во најновото видео издание.
„Оваа ситуација наскоро може да доведе до колапс на веќе стагнантната руска економија. Затоа Кремљ се обидува да ја искористи војната во Украина за да ја подобри демографијата во Русија“ – наведува ЦСКИС, врз основа на статистиката споделена во видеото.
СЛОБОДНА ЗОНА
Дебатата трае. И додека обични луѓе и политичари од целиот свет испраќаат милиони пораки со поддршка за Сана, конзервативците се полни со отров. Не ѝ личи на премиерката така да се однесува, ја загрозила безбедноста на Финска, ја злоупотребила функцијата (танцувала во работно време, аууу!) и што ти не… Како што им личи на заостанати и вечно намуртени душебрижници („ш“ во претходниот збор може да се замени и со „п“), какви што имаме насекаде околу нас и во светот. Нема да ме зачуди ако некаде прочитам дека некој ѝ ставил чип во чашата со пијалок, пишува Џабир Дерала во колумната „Светот оди напред, танцувајќи“.
Д. Муратов
