пишува: ЏАБИР ДЕРАЛА
Тоа дека полициското подземје е длабоко вгнездено во МВР, знаеме одамна. Тоа беше кажано неколку пати и од собраниската говорница во изминатите три години, а стана повеќе од очигледно откако се воспостави техничката влада. Наќе Чулев, по ново Наќе Отсјај, кој ѝ припаѓа на хард кор матрицата на МВРО, е неуморен.
Веќе во првите неколку дена од своето техничко министерување, Наќе Отсјај успеа да ја потсети јавноста на „славното минато“ кога МВР, и според зборовите на тогашната министерка Гордана Јанкуловска, беше МВРО.
Најновиот скандал во кој се вплетка Наќе Отсјај е неговиот „одмазднички поход“ против хуманитарната акција на Зоран Заев и неговото семејство. Конвојот од шест полициски возила кои тргнаа во „политичка“ контрола на стотиците пакети хуманитарна помош е „балансот“ што тој сака да го воспостави со секојдневните скандали на функционерите на ВМРО-ДПМНЕ.
Ова „херојство“ на Наќе Отсјај е комичен обид да се затскрие скандалот со поткупот од 600 евра што го изнудил партиски солдат близок до врвот на партијата на Груевски. А тука е и скандалот со билдерот Мицкоски, кој во време на пандемија, со злоупотреба на полициски ресурси, се „билда“ во затворена теретана.
Министерот Отсјај имаше прилично лош старт. Уште од првиот ден, „воскреснаа“ прашањата околу неговата улога во аферата Диво Насеље и некои други афери и скандали во минатото. Без човек да прелистува онлајн архива, може да се сети на најмалку 10 скандалозни ситуации во кои јавноста го фати на дело техничкиот министер за отсјај.
Во првите неколку дена тргна со реинсталирање на режимската постава на стратешки места во МВР. Се обиде да им го одземе обезбедувањето и службените возила на техничкиот премиер Спасовски и претседателот Пендаровски. Јасно даде до знаење дека „полицијата сега е наша“. Се расправаше со медиумите. Секој втор ден поднесуваше претставки до ДИК и така го кочеше.
Објави заплена на 1,3 тони дрога во Крушопек, а одвај излезе едно килце и тоа поставено како мамец од меѓународната полициска акција. Се сликаше со воениот злосторник Тарчуловски на Прочка. Се слика кај стигне, но затоа не се појавува на седници на Кризниот штаб и на Влада, а кога ќе се појави, гласа против, ги нарекува граѓаните агресивни, а потоа негира сѐ што кажал. Води кампања во работно време, користејќи јавни ресурси. Направи циркус со пасошите. Не постапува по јавните повици да им се стави крај на лажните вести и говорот на омразата кој очигледно се продуцира во неговата партија. Од 4 јануари кога беше изгласана техничката влада, тој фрла „отсјај“ буквално секој ден.
Сите права се задржани. Услови за користење, авторски права и заштита на приватноста.
