Нападот на Русија врз Украина, на драматичен начин ја става светската заедница пред нејзините одговорности, бидејќи во украинската криза многу работи се на тест: границите на меѓународното право, валидноста на договорите, но и самото право на државите да живеат слободно, но и многу работи се под закана од геополитичката стабилност во Европа до меѓународниот енергетски биланс, рече грчкиот премиер Киријакос Мицотакис на почетокот од вонредниот состанок на владиниот совет за национална безбедност, пренесува МИА.
Мицотакис истакна дека светската заедница има можност да им се спротивстави на моќта на оружјето и на оспорувањето на границите и меѓународните договори и го повтори принципот на Грција, дека ги почитува територијалниот интегритет и суверенитетот на сите земји и дека ги осудува „ревизионистичките дејствија“ што се спротивни на тие принципи, но „уште повеќе го осудува бруталното насилство“.
-Затоа, како член на Европската Унија и НАТО се координираме со нашите партнери за нашата реакција да биде, не само заедничка, туку и соодветна на досега невидената руска провокација, рече Мицотакис, додавајќи дека нивното внимание е насочено и кон грчката заедница што живее во Украина, особено во регионот на Мариупол.
На денешниот вонреден состанок на владиниот совет за национална безбедност присуствуваше и министерот за животна средина и енергија Костас Скрекас, а грчкиот премиер истакна дека Владата се прилагодува на новонастанатата ситуација и на национално ниво ја има обезбедена потребната енергија и се разгледуваат сценарија „кои ќе вклучуваат што поголема апсорпција на менувањето на цените на енергијата“.
-Сепак, тоа е проблем, сепак, кој е европски и затоа бара европско решение. А тоа може да значи дури и европски финансиски алатки за справување со поскапувањата на цените на енергијата, се додека траат. И повторно ќе кажам дека сите овие случувања уште повеќе ја истакнуваат потребата од суштинска европска стратешка автономија, рече Мицотакис.