ДРАГАН МИШЕВ
Ќе дојде ли шефот на руската дипломатија Сергеј Лавров идната недела на Министерскиот совет на ОБСЕ во Скопје? И дали воопшто треба да дојде? Дали Министерот за надворешни работи на земјата агресор која претставува најголем ризик за безбедноста во Европа и во светот треба да присуствува на Самит на Организација задолжена за безбедноста и почитување на човековите права? Дополнително, дали воопшто треба да добие покана од земја за која има непријателски став (Русија ја стави Северна Македонија на листата непријателски земји) и константно се меша во нејзините внатрешни работи и евроатлантски аспирации?
Официјална потврда од МНР за неговото (не)доаѓање се уште нема, ја најавија најдоцна до утре, но според некои медиуми, неговото присуство е се повеќе извесно.
Дека процедурата за доаѓање на Лавров во Скопје е веќе отпочната, пред неколку денови потврди и Османи кој рече дека барањата за визи на руската делагција се процесуираат, но порача дека нивното доаѓање во Скопје ќе биде предизвик поради забраната за прелет на руски државни авиони.
Според досегашните информации Руската федарација веќе покажала интрес и преку писмо упатено до претседавачот Османи, побарала да се обезбеди присуство на Лавров на самитот на ОБСЕ во Скопје, но сепак, конечната одлука ќе зависи не само од Македонија, туку и од земјите членки на ОБСЕ и соседите кои ќе треба да дозволат прелет на руски авион.
„Ние ги процесуираме барањата на сите членови на руската делегација за визи и за доаѓање во Македонија. Во моментот кога ќе имаме решение, сигурно ќе информираме. Јас се надевам дека сите министри ќе бидат присутни на конференцијата на ОБСЕ“, изјави Османи.
Според Османи, Северна Македонија треба да обезбеди услови за присуство на сите министри на Конференцијата за да не се доведе во прашање изборот на следниот претседавач со ОБСЕ, кој мора да биде избран со консензус од сите држави.
Од друга страна, министерката за одбрана Славјанка Петровска порача дека Лавров не е добредојден во земјава.
„Нема потврда за доаѓањето на Лавров, меѓутоа со оглед на однесувањето на руската надворешна политика, нивното мешање во внатрешните работи на државите, меѓутоа пред сè нивниот однос кон Украина не гледам зошто тој би доаѓал овде“, рече министерката Славјанка Петровска.
За потсетување, сé уште се на сила санкциите кои ги воведе Северна Македнија кон Русија, иако, според Виенската конвенција, советот на ОБСЕ не е предмет на санкции.
Сепак, при одлуката дали да му се укаже гостопримство на рускиот министер за надворешни работи, треба да се земе предвид говорот на шефот на руската дипломатија Сергеј Лавров пред Парламентот во Москва, по случувањата во Македонија поради намерата на тогашниот премиер Никола Груевски да не ги почитува европските санкции против Русија, кога ја покрена темата дали Македонија треба да се федерализира, дополнително подкрепувајќи ја истата со постоење на идејата за територијална поделба, односно, да се подели земјата на Албанија и Бугарија“.
„Многу е тажно и опасно дека за таа цел се прават напори да се искористи албанскиот фактор. Пред многу години имаше сериозни спротивставувања и тогаш (во 2001) беше потпишан Охридскиот договор, а сега се зборува дека Македонија треба да се федерализира уште подлабоко, дури се предлагаат идеи и да биде разделена – еден дел да биде даден на Албанија, а друг на Бугарија“, изјави Лавров.
Тој исто така обвини дека Северна Македонија се користи како „алатка“ во антируската игра, и спроведувајчи ги руските анти ЕУ и анти НАТО наративи, ја доведе во прашање Евроатлантската определба на државата, велејќи дека земјата станала Северна Македонија за да влезе во ЕУ каде, според него, не била примена и наскоро нема да биде примена и Македонија била „вовлечена“ во НАТО.
Сергеј Лавров уште во 2014 година за сараевски “Дневни Аваз” изјави дека проширувањето на НАТО со поранешните југословенски републики- Македонија, Црна Гора и Босна и Херцеговина, би претставувало грешка и провокација кон Русија.
Истовремено, дозволувајќи му на Лавров влез во државата, ќе се прикажеме како земја за која злосторствата во Украина се прифатливи и дека со тоа ќе брцнеме „прст во окото“ на илјадниците украински жртви на руската агресија врз Украина.
Во јуни 2022 година, неформалната група граѓани „Руси, Украинци, Белоруси и Срби заедно против војната“ одржаа протест во Белград по повод најавената посетата на рускиот министер за надворешни работи Сергеј Лавров на Србија.
Десетина граѓани кои се собраа носеа транспарентот „Во Хаг, а не во Белград“, како и паролa „Благодариме соседи, ја спасивте Србија од срам“, на коja стоеја и црногорското, македонското и бугарското знаме, со кои се заблагодарија за затворањето на воздушниот простор за летови на руски авиони, со што ја оневозмошија посетата на Лавров на Белград.
И сеа, шу праиме?
Како и да е, дошол- не дошол, на Лавров веќе му се даде премногу значење, што руската пропаганда секако ќе го додаде на своетo конто во нејзината пропагандна војна, која, за жал, има големо влијание и во Северна Македонија.
