Украина ја поздравува Чешката Република и Република Северна Македонија за нивниот избор во составот на Извршниот совет на Организацијата за забрана на хемиското оружје (ОЗХО) за периодот 2025–2027 година, се вели во денешното соопштение на Министерството за надворешни работи на Украина.
Според министерството, овие две држави совесно ги исполнуваат одредбите од Конвенцијата за забрана на хемиското оружје и ќе придонесат за ефикасното работење на ОЗХО.
„Значајна карактеристика на овогодинешните избори е тоа што Руската Федерација втора година по ред не успеа да биде избрана за член на Извршниот совет на ОЗХО. Ова е уште еден доказ за продолжената меѓународна изолација на државата агресор“, изјави украинското министерство.
Резултатите од гласањето на 140 држави кои учествуваа во изборите зборуваат сами за себе: Чешката Република – 128 гласа, Република Северна Македонија – 86 гласа, Руската Федерација – 56 гласа.
„Денешното гласање ја покажува принципиелната позиција на меѓународната заедница: сè додека Русија води агресивна војна против Украина, вклучувајќи ја и употребата на опасни хемикалии на бојното поле, таа нема морално право да биде дел од раководните органи на меѓународните организации. Убедени сме дека неодамна предадените докази од Украина, вклучувајќи ја руската граната тип РГ-Во и соодветните примероци од почва, беа важен аргумент во корист на исклучувањето на државата агресор од работата на Извршниот совет на ОЗХО“, оценува МНР на Украина.
Понатаму, во соопштението се открива дека Украина има доволно докази за прекршувањата на нормите на Конвенцијата за забрана на хемиското оружје од страна на Русија и ќе продолжи да ја вклучува меѓународната заедница во решителна спротивставеност на агресорот и неговите незаконски дејства, вклучувајќи го тоа преку независната и експертска работа на ОЗХО.
„Денес меѓународната заедница покажа дека Руската Федерација нема да избегне правична одговорност за прекршувањето на меѓународното право, вклучувајќи ја и Конвенцијата за забрана на хемиското оружје“, се заклучува во соопштението на МНР на Украина.
Подготви: Џ. Д.
