Со почетокот на учебната година, почнуваат и грижите за безбедноста на учениците. Од Министерството за образование и наука за ЦИВИЛ Медиа велат дека заедно со Министерството за внатрешни работи, локалните самоуправи и бројни меѓународни партнерски организации како УНИЦЕФ, ОБСЕ итн, постојано работат на подигнување на нивото на безбедност во училиштата.
„Согласно програмата за работа на Владата се планира зголемување на патролите околу училишните објекти и на локациите каде има поголема раздвиженост на ученици, како и спроведување на едукативни кампањи за спречување на меѓуврсничко насилство“, велат од МОН за ЦИВИЛ Медиа.
Од МОН повикуваат дека секоја конструктивна идеја е добредојдена и може да помогне во остварувањето на целта – училиштата да бидат хармонични средини за престој, едукација и создавање на генерации со вистински вредности.
Претходно, од Министерството за внатрешни работи за ЦивилМедиа изјавија дека во рамки на своите со закони пропишани надлежности, особено пред почетокот на секоја учебна година се носат посебни оперативни планови со мерки и активности што стриктно се однесуваат за сигурноста и безбедноста на училиштата и просторите во и околу истите.
На прашањето дали МВР има соработка со училиштата за превенција и едукација за (не)поседување на ладно оружје?, од МВР потенцираат дека полицијата, придржувајќи се на концептот „community policing“ (односно, полицијата како сервис на граѓаните) е со години наназад во тесна сорработка не само со надлежните во училиштата туку и со надлежните во локалните заедници, и постојано заеднички се прават конкретни проекти, програми, кампањи вклучително и во делот на превенција и рана детекција од разни видови социо-девијатни однесувања кај учениците, како што е континуираниот проект „Безбедност во училиштата“ што константно во соработка со училиштата го спроведува Одделението за превенција при СВР Скопје.
На прашањето дали МВР презема мерки за превенција и контрола што носат младите во нивните ранци и џебови во училиште и надвор од училиштето (двор, улица, автобуси, автобуски станици), од МВР велат дека улогата и функцијата на МВР е јасно регулирана со Устав и закони, и дека за контрола на училишните ранци или контрола практично т.е. личен претрес на учениците (џебови) постојат строго пропишани законски норми и процедури (за малолетни лица) по кои што полицијата единствено може и смее да постапува.
Секоја учебна година носи и ризици за безбедноста на учениците. Неретки се инциденти во кои жртви се учениците или тие се учесници во групно насилство. Инцидентите се случуваат во училиштата и училишните дворови, но уште почесто надвор од нив, на улиците, во автобусите или на места за дружење и забава, како локали и спортски објекти.
Дехран Муратов
Фото: ЦивилМедиа архива / Б. Јордановска
Дали се (не)безбедни учениците во и надвор од училиштата? МВР ја гарантира сигурноста и безбедноста
