По вчерашната пресуда на Основниот суд во Куманово, групата „Правда за Алмир“, која изминатите месеци организираше неколку протести, денеска се огласи со фотографија на која покрај фотографијата на малиот Алмир се испишани зборовите „Не е завршено…“.
Пораката која сакаат да ја испратат до јавноста, но и до институциите е дека борбата за праведно судење нема да заврши тука.
Всушност и адвокатот семејството Алиу, Асмир Алиспагиќ, изјави дека ќе ја обжали пресудата на судот. Еден од членовите на семејството Алиу рече дека не е задоволен од пресудата за првообвинетиот Бобан Илиќ и најави пријави против Обвинителството и судијата.
Основниот суд Куманово вчера ја објави пресудата во „случајот Алмир“ и првообвинетиот Бобан Илиќ го прогласи за виновен за тешки дела против безбедноста во сообраќајот и имотот и му одреди казна затвор од шест години.
Судот за виновен го прогласи и второбвинетиот Седат Алиу, таткото на Алмир, определувајќи му казна затвор од шест месеци. По девет месеци затвор, за сторено кривично дело насилство, добија трето и четвртообвинетите Сами Демири и Абдула Алиу.
М. Ивановска