Најмалку П54алестинци се убиени во два одделни израелски воздушни напади во текот на ноќта, вклучувајќи го и нападот врз училиште во кое се сместени раселени семејства во централна Газа, според медицински лица и претставници на Цивилната одбрана, изјавија двајца директори на болници за Би-би-си.
Училиштето Фахми Ал-Џаргави во градот Газа сместувало стотици раселени лица од градот Беит Лахија, кој моментално е под интензивен израелски воен напад.
Портпаролот на Цивилната одбрана во Газа, предводена од Хамас, изјави дека се пронајдени 20 тела, вклучувајќи ги и оние на деца – многумина беа тешко изгорени, откако пожарите зафатија две училници претворени во живеалишта.
Израелската војска (ИДФ) соопшти дека цел на нападот бил „команден и контролен центар на Хамас и Исламски џихад“, во областа која ја користат „терористите за планирање напади врз израелски цивили и војници на ИДФ“ и го обвини Хамас дека го користи „населението во Газа како човечки штит“.
„Пламен беше насекаде. Видов изгорени тела како лежат на земја“, рече Рами Рафик, жител што живее спроти училиштето, во телефонски разговор со Би-Би-Си. „Мојот син се онесвести кога ја виде ужасната сцена“.
Видео снимките споделени на интернет покажаа големи пожари што проголтуваат делови од училиштето, со графички слики од тешко изгорени жртви, вклучувајќи деца, и преживеани кои претрпеле критични повреди.
Локалните извештаи велат дека меѓу загинатите е Мохамед Ал-Касих, раководител на истрагите за полицијата на Хамас во северна Газа, заедно со неговата сопруга и деца.
Одделно, во напад врз куќа во Џабалија во северна Газа загинаа 19 лица, според директорот на болницата Ал-Ахли, д-р Фадел ел-Наим. Израелската војска сè уште не коментирала што било цел.
Кратко пред нападот во училиштето, друг израелски воздушен напад погоди куќа во центарот на градот Газа, при што загинаа уште четири лица, соопшти Министерството за здравство управувано од Хамас.
Двојните напади се дел од поширока израелска офанзива што ескалираше во северниот дел од енклавата во текот на изминатата недела.
Д. Мишев
