Населбата Тризла во Прилеп не е жариште на заболени од „Ковид -19“. Од појавата на првите заболени во Прилеп на 25-ти март, во оваа населба новозаболен е евидентиран на први мај и оттогаш до денес кластерот брои седуммина.
“Петмина од заболените се од две семејства, останатите двајца се од други семејства. Едно лице работи во дуќан во населба Тризла, но не е жител на населбата. Такашто, не би рекла дека се случува нешто драматично во Тризла, луѓето од овие фамилии се во работен однос, работат во различни фирми во градот. Се врши активен надзор врз нивното здравје како и врз сите останати. Секојдневно сме во контакт и се следат и нивните контакти кои се изолирани. Тоа важи за сите активни 7 кластери во градот. Така ги откриваме во последнава недела новите позитивни случаи“, изјави д-р Татјана Мургоска Станимировиќ , епидемиолог во Центарот за јавно здравје (ЦЈЗ) – Прилеп.
Според градоначалникот Илија Јованоски недозволиво е да се стигматизираат граѓаните на ниту една етничка заедница.
„Сакам како градоначалник, како лекар, но пред се како човек, да кажам дека сум згрозен од вчерашната намера на опозициската ВМРО-ДПМНЕ која злоупотребувајќи ја состојбата со корона вирусот се обиде да внесе нови поделби помеѓу граѓанините на нашата општина. Никој нема право да стигматизира и да дискриминира ниту една етничка заедница, дека токму тие се најпогодени од корона вирусот, во случајот Ромите од населбата Тризла -2,“ изјави градоначалникот на Општина Прилеп, додавајќи дека од болеста се заболени граѓани поеднакво од сите етнички заедници. Процентот на заразени граѓани во Тризла -2 како што рече тој е ист како и процентот на заразени граѓани во другите урбани заедници: Центар, Вишне, Ѓогдере и др.
Демантите од надлежните доаѓаат по вчерашниот прес на ОК на опозициската ВМРО-ДПМНЕ на која градоначалникот Илија Јовански и претседателот на Советот на Општина Прилеп Миле Талевски (лидер на ОО СДСМ- Прилеп) беа обвинети дека со делењето на хуманитарна помош во Тризла, придонесуваат за ширење на пандемијата. Отворајќи го прашањето дека во оваа населба во последниот период има поголем број на заболени граѓани.
Што се однесува до спроведувањето на владините мерки за постепено повторно отворање на градинките, од Центарот за јавно здравје исто така најавија дека ќе се врши скрининг за градинките во Прилеп на 28-ми и 29-ти мај. Тестирањата ќе се реализираат во ЦЈЗ и во градинките. Во Прилеп евидентирани се 193 случаи на корона вирус од кои 63 се активни. Три нови случаи на корона вирус се евидентирани денеска во Прилеп, а двајца излекувани.
Климентина Ѓорѓиеска
