„Проблемот со Државната комисја за спречување на корупцијата е двоен. Од една страна, таа воопшто во случајов и не би требало да дава мислење или мислењето коешто го дава, треба да се земе со резерва, заради тоа што автентичното толкување на Законот, едниственото автентично толкување, може да го даде само Собранието на Република Македонија. Значи, ако сакаме да го издигнеме решавањето на проблемот на ниво коешто би значело употреба или соодветна употреба на законската регулатива, најдобро е Собранието да си го преземе ова во свои раце, како своја надлежност, изјави за ЦИВИЛ Mедиа, професорката д-р Мирјана Најчевска.
„Од друга страна, во други случаи, кога станувало збор за делокруг на самата Антикорупциска комисија, кога од неа мислење побарале соодветни министерства, токму во врска со оваа проблематика, Комисијата дала дури и спротивно мислење. Да речеме, кога станувало збор за Министерството за надворешни работи и именувањето на амбасадори, во време кога веќе се распишани изборите, истата оваа комисија дава мислење дека не станува збор за прекршување на законот, заради тоа што станувало збор за именување, а не и за вработување!? Независно што во некои од случаите, станувало збор за луѓе коишто и не се вработени во МНР!“, изјави Најчевска за ЦИВИЛ Медиа.
„Што се однесува до прашањето на кој начин може да се разреши целата оваа ситуација на разрешување на Републичкиот јавен обвинител од функцијата којашто ја има, мислам дека постојат различни варијанти. Она што, да речеме, јас го предлагам и коешто можеби би претставувало еден малку подрастичен пресек на целата работа, е едноставно, во одреден момент, претседателот на Собранието да си ја преземе надлежноста во свои раце, да прогласи дека веќе е завршена суштинската расправа. Бидејќи, последниве денови сите ние сме сведоци дека воопшто не постои вистинска суштинска расправа за точката на дневен ред, односно за причините за разрешување на Републичкиот јавен обвинител, туку се зборува за сè и сешто од парламентарната говорница. Претседателот на Собрaнието трeба да прогласи – момент на гласање. Значи, завршена е расправата, сега можеме да пристапиме кон гласање и едноставно на тој начин да заврши оваа голгота“, децидна е професорката Најчевска.
Маја Ивановска
