„На само две и пол недели од одењето на пратениците на колективен одмор и три недели до распишување на изборите, имаме правна несигурност и доведување во прашање на уставно загарантираните права на илјадници граѓани и преседан во историјата на државта, со недефинирање на учеството на независните кандидати на претстојните избори“, велат независните кандидати.
Независните кандидати од повеќе општини во земјата сметаат дека е повредено уставно загарантираното пасивно избирачко право и правото да учествуваат во вршењето на јавни функции од член 23 од Уставот, со што и на граѓаните кои ги поддржуваат им се ограничува избирачкото право и правото на политичко дејствување од член 22 од Уставот.
„Владеачката ВМРО-ДПМНЕ не прифаќа да се сретне со нас и заедно да се утврдат условите за кандидирање на независните кандидати, да се достави нов предлог кој ќе ја почитува Одлуката У.бр.186/202 на Уставниот суд и нема да го повлечат сегашниот заглавен Предлог-закон за измени и дополнувања на Изборниот законик, кој е противуставен и не ја почитува одлуката на Уставниот суд. Владата не доставува мислење до Законодавно-правната комисија по барањето за автентично толкување на член 65 став (4) од Изборниот законик, поднесено во наше име од пратеничката Моника Зајкова на 25.06.2025. Нема автентично толкување на сегашната состојба на Изборниот законик и нема донесено нови измени“, се наведува во нивното соопштение.
Нивните барања се:
- Барање до претседателот на Државната изборна комисија г. Борис Кондарко, итно да бара од Владата да се произнесе по доставеното барање за автентично толкување на член 65 став (4) од Изборниот законик, поднесено од пратеничката Моника Зајкова на 25.06.2025, Законодавно-правната комисија итно да изготви предлог на автентично толкување, а пратениците да го усвојат.
- Барање до Владата итно да достави мислење до Законодавно-правната комисија по доставеното барање за автентично толкување.
- Барање до Законодавно-правната комисија итно да оценат дали барањето за давање на автентично толкување е оправдано и ако е оправдано, да изготват предлог на автентично толкување и го достават до Собранието. Ако мислењето од Владата е неопходно за оценување на оправданоста, да побараат од Владата да им се достави мислењето по најитна постапка.
- Барање до претседателката на РСМ, г-a Гордана Сиљановска Давкова, да се обрати јавно до Собранието, Владата и медиумите и бара под итно да се овозможи правна основа за учество на независните кандидати на претстојните избори.
„Бараме разрешување на овој преседан во најбрз можен рок и правна основа за учество на независните кандидати на локалните избори“, велат независните од Карпош, Центар, Гази Баба. Град Скопје, Тетово, Битола, Ново Село, Струмица и Босилово.
