ЦИВИЛ покани бројни јавни личности да учествуваат на годишниот настан „Перспективи 2023“ со изјави за свои видувања на изминатата година и перспективите за претстојната. На поканата одговори и политичкиот аналитичар Џелал Незири, кој во своите одговори за ЦИВИЛ Медиа се осврнува на главните случувања од изминатата година, и свое гледиште за тоа како ќе изгледа 2023 година на политичко, економско и општествено ниво.
ЦИВИЛ: Како ќе ја оцените годината што изминува?
Незири: 2022 година беше година на кризи. Заврши кризата предизвикана од пандемијата на коронавирус, продолжи кризата предизвикана од руската агресија во Украина. Порастот на цените на основните прехранбени производи, енергијата, инфлацијата, неизвесноста и цикличните политички кризи ја карактеризираа 2022 година. На национално ниво, односно во Северна Македонија, исто така има драматични движења. Отворањето на пристапните преговори со ЕУ по 13 години чекање беше несомнено добра вест за сите. Но, тековната економска криза тешко ги погоди граѓаните, особено најсиромашните слоеви на општеството.
ЦИВИЛ: Кои се перспективите во претстојната година?
Незири: Ќе биде многу подобро од оваа година. Светот веќе успешно ги преброди шоковите од пандемијата и војната во Украина. Северна Македонија му припаѓа на Западот, кој веќе најде начини да управува со енергетските или геополитичките кризи. Западот не е географија, туку вредности што значат демократија, слобода, еднаквост, владеење на правото, солидарност и човечко достоинство. Сè додека земјата ќе продолжи да ги негува овие вредности, нема да има причина за грижа. Блокадите кон ЕУ мора да бидат минато. Нема повеќе соседни земји кои можат да стават вето на патот на Северна Македонија кон ЕУ. Забрзувањето на интеграциите значи пристап до повеќе европски фондови и инвестиции, пристап до програмите на ЕУ, европскиот пазар на труд и слично. Овој процес ќе ги открие и елиминира сите системски недостатоци или пречки кои го спречуваат економскиот развој. Политичките партии мора да се обединат околу европската агенда. Има многу други теми за силни замерки, како корупција, немање резултати во различни сфери на животот, немање социјална правда итн. Но, овие приговори не треба да доведат до блокада во процесот на евроинтеграции.
превод од албански и обработка на текст: Д. Тахири
Извор: CivilMedia | Оваа содржина е дел од серијата панел дискусии на ЦИВИЛ и мултитематски медиумски прилози, ставови и анализи под заеднички наслов Перспективи 2023. Дозволено е преземање според лиценцата Creative Commons 4.0.
