Џ.К (68), А.К.(44), Ш.К. (39) и Е.У. се луѓето коишто се посочени во извештајот на МВР како можни сторители на полов напад врз 12 годишната штитеничка чија животна приказна ја потресе целата јавност.
Според извештајот на МВР против овие лица е поднесена кривична пријава, но истрагата е проширена и на други лица за што допрва ќе биде поднесена кривична пријава до Основното јавно обвинителство.
Во недостаток на одговори и конкретна акција од институциите досега, се обидовме да дознаеме дали некои од овие иницијали се совпаѓаат со луѓе кои се веќе осудени за педофилија. И нормално го побаравме онлајн регистарот на педофили, кој нормално не работи! Исто како и се останато во нашата држава!
Од она што е видливо кога ќе се побара веб-страницата www.registarnapedofili.mk, според нашите скромни познавања, најверојатно се работи за истекување на договорот со серверот за чие обновување или префрлање се потребни 3-4 часа работа и ден до два за да го креираат повторно ако ги имаат сите информации при рака. На толкава машинерија задолжена за имиџот на институциите на веб-страниците и социјалните мрежи, веројатно се уште не е пронајден вистинскиот човек за да го среди овој проблем.
Овој регистар беше отворен во 2012 година од Министерството за труд и социјална политика, а според информациите до кои дојдовме не функционира повеќе години.
Дали ова значи дека јавноста треба да врши притисок на дневна основа врз претставниците на надлежните институции за да проработат, и за којашто работа, патем, се платени од граѓаните? Дали треба да се случи уште едно злосторство, во низата на – за јавноста непознати злосторства, или, да бидат лично засегнати за конечно да се помрднат од дувлата наречени државни институции и разни органи, во коишто со нивното неделување, се рамнат со соучесништво во злостортвата?
М. Ивановска
