(прес центар на ЦИВИЛ, 29 октомрви 2017, 21:30)
Видео анализа на Александар Новакоски, правен експерт, поранешен претседател на ДИК ги анализира локалните избори од позиција на правен експерт и еден од најискусните познавачи и практичари во оваа област.
„Морам да кажам дека овој втор изборен круг од локалните избори очигледно помина во фер и демократска атмосфера, се разбира, во однос на информациите со кои располагаме и кои се јавуваа во текот на денот, а и по завршувањето на изборите.
Но, повторно се случува една политичка партија да не ги признава изборите, но не може да се аргументира и да се докаже кои се причините зошто не се признаваат овие избори. Дилемите повторно ќе останат, осбоено што таа политичка партија директно учествуваше на овие избори, во вториот круг во општините, и колку што имаме информации, а во една општина прославува и победа, а ќе остане и недоречено кои се тие големи масовни нерегуларности за да не се признаат изборите.
Ако земеме дека изборниот процес се оценува од самиот почеток, од самото распишување на изборите до самото завршување, видовме и самите после првиот круг на локалните избори, исто така и мисијата на ОБСЕ и ОДИХР, излегуваше со некои конкретни податоци за нерегуларностите и имајќи предвид дека се чека оценката и за овој втор круг, мислам дека во вториот круг се избегнаа некои технички пропусти кои беа направени од страна на изборната администрација во текот на првиот круг. Добро е што овие нерегуларности немаа некое пресудно влијание врз изборните резултати. Но, секако, треба да се обрне внимание, бидејќи тие, наизглед, технички пропусти во некои следни избори можат на направат сериозни проблеми, околу спорење на изборните резултати.
Морам да кажам дека непризнавањето на изборите од страна на еден од учесниците во изборниот процес, комплетното непризнавање на резултатите и наведување на низа нерегуларности ми дава за право да сметам дека тоа беше организирано, а имајќи го предвид и текот на кампањата, со оглед на снимените изјави кои биле во текот на денот, а кои не се објавуваа во текот на молкот, мојата оценка е дека секако нема да поднесат ниту приговори. Со тоа останува недоречено каде се тие нерегуларности, од кој вид и од кој обем.
Ако го оставиме сето ова настрана, денеска повторно имаме одредени јавувања за лица кои не можеле да го остварат правото на глас. Тоа е проблем кој се јавува и во вториот круг. Можеби тие лица не се во толку голем број и можеби нема да влијаат на резултатите, но имајте предвид дека ова е мнозински систем каде влијае и еден глас и некои лица повторно не го остварија своето право на глас, иако во меѓувреме извадиле валидни документи.
Секако, мора да се размислува во насока на менување на изборниот законик, бидејќи не може на заклучен избирачки список на некој кој има право на глас да не му се дозволи да гласа. Во моментот, законска можност не постои. Ние не обвинуваме никого, но тоа е нешто што мора да се отстрани бидејќи правото на глас е неприкосновено и со Устав загарантирано и не може со административни пречки од државата да се попречува да го оствари тоа право на глас.
Во однос на медиумите мислам дека повторно имаше избалансирана кампања. Исто така, можам да забележам дека во вториот круг, последната недела имаше исклучиво црна кампања, од страна на сите учесници во изборниот процес. Дали оценките на нивните штабови се дека така ќе добијат повеќе гласови е прашање. Се покажа дека за некои можеби била добра таа црна кампања, но за некои таа имаше контра ефект. Но, како никогаш до сега беше забележително дека сите спотови беа со црна кампања“, истакна Новакоски.
Како и секогаш, ЦИВИЛ со најбрзи и најпрецизни податоци и анализи за изборниот процес, благодарение на извонредниот тим на аналитичари и вредни и посветени набљудувачи.
камера: Дехран Муратов
фотографија: Биљана Јордановска
монтажа: Џабир Дерала
обработка на текст и транскрипт: Маја Ивановска
