„Републички Јавен обвинител ќе треба да биде човек со висок кредибилитет, признат и познат во јавноста, бидејќи ќе ја носи клучната улога во реформите во правосудството. Гледаме што се случува со СЈО, со процесите што ги отвори. Јас имав идеја да се кандидирам, но имајќи предвид дека целата таа постапка се политизира, сериозно ќе размислам“, изјави за ЦИВИЛ Медиа, правниот експерт Александар Новакоски.
„Јас сум ‘за’, јавен обвинител да се избира на непосредни избори. Има таква практика во светот, каде обвинителите од понизок ранг се избираат на избори. Кога се избира на пример, градоначалник во САД, во исто време, се избира и јавен обвинител. Значи 99 отсто од претседателите на САД се поранешни јавни обвинители и се избирани непосредно од граѓаните. Тоа е добра идеја, но бара голема анализа, имајќи го во вид начинот на спроведување на изборите во Репубика Македонија. Сепак, изборот на Републички јавен обвинител, сметам дека ќе остане во собраниска постапка“, вели Новакоски.
„Обвинителството доби нови простории. Но, Македонија не е само Скопје. Да видиме во каква состојба се обвинителствата во другите градови. Како адвокат застапувам кривични предмети и се движам низ цела територија на Македонија. Обвинителствата се во ужасна состојба, без полиција не можат да излезат на лице место, немаат превозни средства, а, имаат таква улога со новиот Закон за кривична постапка. Но, еден обвинител не може да го реорганизира целото Обвинителството. Републичкиот јавен обвинител треба да има визија како да функционира Обвинителството и таа визија да ја спроведе. За изборот на државен јавен обвинител треба да се најде компромис за начинот на избор во Собрание. Во спротивно, избраното лице ќе биде шиканирано и оневозможено да ја врши работата. Обвинителот треба да биде личност, на која не ќе може да ѝсе јави ниту еден политичар“, порачува Новакоски.
Моника Талеска
Камера: Дехран Муратов
