На Јутјуб каналот Fenix A1 се објавени две нови „бомби“, телефонски разговори меѓу поранешната министерка за внатрешни работи Гордана Јанкуловска, Никола Груевски и Љупчо Шврговски, поранешен обвинител, како и и меѓу Драган Павловски Латас и тогашниот директор на УЈП, Горан Трајковски, за политичката позадина за затворањето на А! телевизија, пренесува НоваТВ.
Двете видеа покажуваат политичка калкулација како најдобро да се затвори А1 Телевизија. Како што заклучуваат од НоваТв, разговорите покажуваат дека затворањето на телевизијата се водело „во политички кругови и надвор од законски релевантните институции на правосудиот систем“.
А1 Телевизија престана да емитува програма на 31 јули 2011 година со одлука на АЕК. за одземање на лиценцата затоа што телевизијата била во отворена стечајна постапка. Велија Рамковски сопственикот на А1 Телевизија, неговата ќерка Емел Рамковска и уште неколку негови соработници во исто време ги притвораат поради основано сомнение за кривично дело затајување на данок.
Велија Рамковски излезе од затвор на 21 август 2017 година, а неговата ќерка Емел на 26 август 2016 година. ЦИВИЛ во два наврата организираше панел дискусии „Жртви на режимот: сведоштва и слики“ со цел да не се заборават злоделата на еден авторитарен режим во период од 2006-2016. Како панелисти учествуваа и Велија и Емел Рамковски.
„Имав најава, видов што сè се случи со А1 телевизија, ги чекав дома, повеќе од 2 часа, да дојдат и да ме земат. Можев да избегав, ама ги чекав. Децата спиеа. Не знам колку возила беа, пет или шест. Се јавив на жената која ми помагаше со децата, да биде тука со нив. Додека влегуваа во мојот дом, да прават претрес, се сеќавам во истиот момент ги носевме децата во друга соба, среќа не се разбудија“, раскажува Рамковска присетувајќи се на денот кога ја притворија.
„28 месеци не можев да ја видам Емел, мојата ќерка која беше во другата зграда од затворот. Намерно не ми дозволуваа да може да се видиме, бар преку прозорец. Се радував на судењата зашто само таму можев да ја видам сопругата и ќерката. Груевизмот е длабоко во институциите. Сега сум малку исплашен. И после три години Груевизмот ме плаши. Сите нè плаши“, рече Рамковски на панелот на ЦИВИЛ што се одржа на 21 декември 2019.
Б. Ј.