Новинарката Мирослава Бурнс побара извинување и повлекување на текст од порталот доказмакедонија.мк, објавен со наслов ,,Дебелата Мирослава дедојебојка сака да печали на грб на Доказ од Европска Унија”, бидејќи во текстот се изнесени низа клевети и навреди со кои и се нарушени честа и угледот. Но, наместо извинување и повлекување на текстот од порталот Доказ, новинарката Бурнс доби „ма мрш у п…. материну“, односно објавениот „демант“ со наслов „Дедоебојката барала демант од ДОКАЗМ, а кој те тера да се закачаш бе“, изобилува со говор на омраза и сексизам.
„Согласно член 8 од Законот за граѓанска одговорност од клевета и навреда, за клевета одговара тој што за друго лице со утврден или очевиден идентитет, со намера да наштети на неговата чест и углед, пред трето лице изнесува или пронесува невистинити факти што се штетни за неговата чест и углед, а знае или бил должен и може да знае дека се невистинити.
За навреда одговара тој што со намера да омаловажи, со изјава, однесување, објавување или на друг начин ќе изрази за друг понижувачко мислење, со кое се повредува неговата чест и углед. Доколку навредата е сторена преку средство за јавно информирање, можат да одговараат авторoт на изјавата, уредникот или лицето кое го заменува во средството за јавно информирање како и правното лице.
Со ова барање во согласност со член 13 од Законот за одговорност од клевета и навреда барам од Вас да неточната и навредлива вест ја повлечете и да се извините. Извинувањето и јавното повлекување барам да го објавите на истото место и во ист обем на интернет страницата доказмакедонија.мк во рок од 48 часа, како истото би го дало законски предвидениот ефект на ублажување на штетата.
Како автор на погорецитираните невистинити тврдења Ве повикувам најдоцна во рок од 48 (четириесет и осум) часа од примањето на ова барање, јавно да ми се извините и да ги повлечете изнесените невистини и навреди кои ги направивте достапни за јавноста и преку профилите на Фејсбук на на јавноста преку Вашиот профил на социјалната мрежа „фејсбук“, на начин што извинувањето и повлекувањето ќе ги објавите на истото место и во истиот обем.
Во спротивно, Ве известувам дека согласно Законот за граѓанска одговорност за навреда и клевета против Вас и против правното лице, преку мојот правен застапник ќе поведам соодветна судска постапка пред надлежниот суд“, истакна Мирослава Бурнс во демантот.
Но, откако Маријан Стаменковски од Доказ не и се извини на Бурнс туку продолжи да ја навредува, таа на својот Фејсбук профил напиша: „Каде тоа ние живееме? Како ова се дозволува? Кој му дава на овој портал пари за функционирање? На што ова личи? Ама последно да ми е, ќе го тужам. И не, нема да биде за едно евро. Мојата чест вреди повеќе“.
Д.М.