ВЕСТ НА ДЕНОТ: Заев до министрите: Да го слушаме гласот на граѓаните оти нив им служиме
Премиерот Зоран Заев денеска при врачувањето на мандатните писма на министрите во Владата на Република Северна Македонија истакна дека од министрите очекува во извршувањето на нивните должности и Програмата за работа на Владата во наредните четири години да се вклучат без задршка и со целосна професионална посветеност.
„Како министри и министерки слушајте го гласот на граѓанинот како прецизна насока која доаѓа од највисоко ниво и од која нема отстапување. Mора да им служиме на сите граѓани, без разлика на нивната етничка, партиска припадност, пол, род, сексуална ориентација, родов идентитет, раса, боја на кожа, потекло, припадност на маргинализирана група, јазик, социјално потекло, образование, религија, политичко уверување, друго уверување, попреченост, возраст, семејна или брачна состојба, имотен статус, здравствена состојба, лично својство и општествен статус“, рече Заев.
ЦИВИЛНИ АКТИВНОСТИ
Џевдет Хајредини, поранешниот министер за финансии, во интервју за ЦИВИЛ Медиа зборува за национализмот, како било во деведесетите за време на Југославија, и како е сега.
Корупцијата се маскира зад национализмот, како што зборувавме, за идеологиите на нациите во минатото, сега зад тоа е само корупцијата и ништо друго.
ФЛЕШ ВЕСТИ
Премиерот Зоран Заев придружуван од вицепремиерот за борба против корупција, за одржлив развој и човечки ресурси Љупчо Николовски, шефот на дипломатијата Бујар Османи, министерот за правда Бојан Маричиќ и државните секретари Калина Габер од Секретаријатот за европски прашања и Зоран Попов од Министерството за надворешни работи, денеска одржаа утринска брифинг средба со амбасадорите на земјите членки на Европската Унија во нашата држава.
Новата Влада планира во следните четири години да отвори 80 отсто од поглавјата во преговорите за влез во Европската Унија и да ги донесе европските стандарди дома.
Христијан Мицкоски е изолиран и осамен во претседателскиот кабинет на ВМРО-ДПМНЕ. Никој повеќе не верува на неговата глума, лажните солзи и празните и апсурдни тези, велат од Иницијативниот одбор за свикување на вонреден конгрес на ВМРО – ДПМНЕ.
Министерката за труд и социјална политика, Јахода Шахпаска денеска изјави дека установите за згрижување и воспитување се подготвени на 9 септември да ги примат децата согласно здравствените протоколи.
Лидерот на ДУИ, Али Ахмети и денеска сведочи пред Меѓународниот суд за Косово.
Охридскиот советник од редовите на ДУИ, Нефи Усеини и неговиот брат добија нови 30 дена притвор по барање на Обвинителството, поради страв дека тие ќе избегаат.
Македонските адвокати отсега може да полагаат трансферен испит и да работат со титула адвокат во Англија и Велс, објави утрово на својот фејсбук профил министерот за правда Бојан Маричиќ.
СЛОБОДНА ЗОНА
„За поздравување е ставањето ред со дивоградбите. Но добро ќе биде ако се ослободиме и од тешките последици на Скопје 2014. Дивоградби, криминални зделки, незаконски тендерски постапки, злоупотреба на службената положба… Има тука доволно материјал и за судења и за конфискации и за рушење. Добро е што Шпанските скали паднаа на суд, ама и на Скопје 2014 му е време да падне“, пишува Џабир Дерала во „Дивоградби, селанска буна, неизбежниот Мицко и… се вратив од одмор“.
Д. Муратов
