На прес-конференција Граѓанската иницијатива „О2 Kоалиција за чист воздух“ заедно со граѓански здруженија и иницијативи, активисти од цела Македонија изјавија дека вечерва во 18:30 ќе поднесат барање до г. Зоран Заев, Претседател на Владата на Македонија, за редистрибуција на буџетските средства кон зголемена заштита на животната средина, намалување на загадувањето и запирање на рудниците, со обезбедување на средства не помалку од 2.5% за Заштита на животната средина од вкупните расходи за 2018.
„Ако барањата не бидат прифатени, ние како граѓани, ќе преземеме правни чекори и ќе поведеме постапки против Република Македонија за кршење на ратификуваните конвенции, Устав, човекови права и права на детето“, велат од О2 Коалицијата.
Во барањето до Зоран Заев се вели дека доколку не се остварат нивните барања освен што ќе се превземат сите правни чекори на располагање за покренување на постапки против Република Македонија, исто така, ќе го известат ОХЦХР, Канцеларијата на Високиот комесар за човекови права на Обединетите Нации, ќе поднесат жалби до Комитетот за правата на детето при Обединетите Нации и Комитетот на Обединетите Нации за човекови права, а ќе се обратат и до Специјалниот известувач за импликациите по човековите права на еколошки здравото управување и депонирањето на опасните супстанции и отпадот, при Советот за човекови права на Обединетите Нации, како и до Специјалниот известувач за човековите права и животната средина, при Советот за човекови права на Обединетите Нации, за утврдување на кршењето на човековите права и животната средина во случајот со рудниците Иловица и Казандол, РЕК Битола, УНЕСКО заштитениот Охрид со Охридското езеро, отворената депонија на згура на Топлиницата во Велес…
„Веќе се знае колку, каде, што и како е загадено. Доколку вие сте некој што има обврска да преземе некаков чекор, а тоа не го правите, вие учестувавете во таканаречениот еко геноцид. Сметам дека проблемот со загадувањето во целата држава станува нешто што може да го наречеме елементрана непогода. Доколку во оваа состојба оној кој е најповикан не преземе ништо, нам не ни останува ништо повеќе, освен по вечерашната средба со Зоран Заев да преминеме кон последниот чекор, барање и тропање на меѓународните врати“, изјави Душко Груевски.
Потписници на барањето се Меѓаши, Еколошка Групација Грин Пауер од Велес, Движење Еко Герила, Тетово, Здружение на граѓани Спас за Нас од Гевгелија, Здружение за развој, едукација и еколошка етика Полимат 13, Богданци, Здружение Еко Правда, Валандово, Еколошко здружение Здрава Котлина од Струмица, Еколошко Здружение Еко Долина, Ново Село, Граѓанска иницијатива „Стружани за Струга”, Граѓанска иницијатива „Охрид ЅОЅ”, Граѓанска иницијатива „Куманово бара чист воздух“ и граѓанските активисти од Битола Илија Балтовски и Душко Груевски.