Кривичниот суд соопшти дека е прифатен обвинителниот акт поднесен од Јавното обвинителство за настаните во Собранието на Република Македонија на 27 април минатата година. Дваесет и осум лица се обвинети за кривично дело „терористичко загрозување на уставниот поредок и безбедноста“, а две за помагање при вршење на истото кривично дело.
Со одлука на општинскиот совет, денеска во Велес е ден на жалост поради погребот на трите деца што завчера го загубија животот во пожар во семејната куќа во високиот дел на градот на ридот Вршник. Советот донесе и решение на семејството на Никола Давчевски да му се додели еднократна парична помош во износ од 100.000 денари, а општината да ги покрие трошоците за обезбедување гробно место во висина од околу 13.000 денари.
Тимот на ЦИВИЛ во текот на вчерашниот ден го посети велес каде ја организираше работилницата „Каква Македонија сакам?“ на која учествуваше и градоначалникот на општина Велес Аце Коцевски. Со присутните граѓански активисти сподели информации што се однесуваа на активностите на општината во областа на зачувување и заштита на животната средина и подобрување на животот на велешани. Меѓу другото, Коцевски истакна дека во процесите на евро-интеграција, тој како градоначалник ќе се обиде тие да се постигнат преку транспарентност и соработка со граѓанското општество, но и со граѓаните.
Тимот на ЦИВИЛ Медиа ги праша велешанки и велешани каква Македонија сакаат. Освен што сакаат мирна и просперитетна Македонија, граѓаните иднината на Македонија ја гледаа и низ призма на промена на името на државата.
Премирот Зоран Заев денеска изјави дека очекува Македонија следната недела да добие датум за почеток на прегворите за членство во ЕУ. Се надева дека со чекорите што ги презема земјава, ќе ги убеди сите кои се уште имаат одредена резерва за проширувањето на ЕУ.
Земјите членки на ЕУ, а пред се „скептиците и кочничарите“ од Франција, Холандија и делумно од Германија, на Самитот на Унијата следната недела, треба да го признаат постигнатиот напредок со потпишувањето на договорот меѓу Скопје и Атина и да дадат зелено светло за почеток на пристапните преговори со Македонија, смета Франк Шаусбергер, специјален советник на еврокомесарот за проширување и соседска политика, Јоханес Хан.
Германската канцеларка Ангела Меркел денеска испрати писмо до премиерот Заев и македонската влада во кое ги упати своите честитки за Договорот со Грција, но и изрази поддршка за македонската интеграција во НАТО и Европската Унија.
Д. Муратов
