На социјалната мрежа Твитер, која кореспондира со неколку слични објави и на социјалната мрежа Фејсбук, се тврди дека постои истрага на МВР за, како што велат тие, „неподобните“. Твитер профилот Волф пишува: „Од каде му е правото на ЦИВИЛ да кажува што е говор на омраза, што фашизам, што е исправно а што лошо? Од каде им е толкава моќ да осудуваат неподобни истовремено тоа е проследено со истрага од МВР кон неподобните…“
Оваа информација ја пласираат токму оние што веќе подолго време шират лажни вести, дезинформации и говор на омразата на социјалните мрежи. Речиси секојдневно, мета на лажни вести, дезинформации и екстремен говор на омразата е и ЦИВИЛ како организација, како и активисти за човекови права, експерти и колумнисти кои соработуваат со организацијата.
Ако МВР навистина покренало истрага, таквиот чекор може само да се поздрави и да се поддржи, бидејќи е законска обврска на институциите, односно да реагираат по допрен глас. Но, како дошло до тоа овие структури што шират говор на омраза и повикуваат на екстремно и политичко насилство, да имаат информации за евентуална истрага во МВР?
ЦИВИЛ вчера испрати прашања и до МВР, но досега нема никаков одговор. Прашањата се:
– Дали навистина постои било каква постапка и како е можно за ова да знаат токму тие за кои постапката (евентуално) се води?
– Од каде овие структури знаат дали/дека е покрената истрага на МВР?
– Доколку навистина постои истрага и овие структури за тоа дознаваат први, дали треба да се чувствуваме незаштитени и од структурите кои се внатре, во институциите, меѓу кои е и МВР?
ЦИВИЛ најави дека ќе ја продолжи својата борба против овие крајно деструктивни појави во јавната комуникација. Дел од активностите што ги преземаат тимовите на ЦИВИЛ се архивирање и објавување на содржините и нивните продуценти и дистрибутери, како и да разоткривање и разобличување на лажните вести и дезинформациите во медиумите и социјалните мрежи.
Со оглед на сериозноста на заканите, Редакцијата одлучи да не го открива идентитетот на авторките и авторите на дел од овие текстови. Воедно, ЦИВИЛ ги повикува властите навистина да преземат законски мерки за превенција од насилството со кое одредени групи и поединци се закануваат.
Редакцијата