Вториот круг избори во Северна Македонија беше во натпреварувачки дух, но и понатаму имаше наводи за притисок врз гласачите, и изборната администрација вложи напори да одговори на некои процедурални недостатоци од првиот круг. Меѓутоа, негативната реторика и наводите за притисок врз гласачите и кандидатите продолжија да имаат негативно влијание на изборите, според изјавата на меѓународните набљудувачи од Канцеларијата на ОБСЕ за демократски институции и човекови права ( ОДИХР).
„Може да се стори повеќе за изборите во Северна Македонија да бидат поинклузивни, за независните кандидати како и за оние што ги застапуваат помалите партии“, изјави Тана де Зулуета директорката на мисијата за набљудување на изборите на ОДИХР.
На вчерашната прес конференција, Зулуета одговори на прашањето од ЦИВИЛ за нивниот став за пријавите за црна кампања пред изборите и за време на изборниот ден, како и кои мерки треба да бидат преземени од страна на институциите.
„Во врска со негативната реторика , конкретно, личните напади кон одредени кандидати, и тоа честопати жени, но и подиректно, , што се случи на социјалните медиуми и по непосредно, во јавните говори , коко што забележавте, ние сме против тоа, сметаме дека се коси со најдобрите практики, на тој начин не се добива клима во која кандидатите можат да кажат јасно кои се нивните ставови, исто така на гласачите им се оневозможува да го определат своето мислење и станува како гладијаторски ринг“, изјави Зулуета.
Мисијата на ОДИХР за набљудубање на изборите во Северна Македонија започна со работа на 7 септември, со тим од 16 експерти со седиште во Скопје. Во вториот круг во мисијата беа вклучени 23 набљудувачи од 13 земји. Конечниот извештај со препораки за подобрување на изборниот процес ќе биде објавен за приближно два месеци.
Извештајот на ОДИХР за вториот изборен круг може да се прочита на следниот ЛИНК.
