Поради отсуство на бранителот Насер Рауфи, Кривичниот совет со кој заседаваше судијата Јово Вангеловски, денеска ја одложи јавната расправа по жалбите на шестeмина осудени за петкратноto убиство во случајот „Монструм“, за што добија доживотни затворски казни. На 9 јуни е закажан новиот термин за јавна расправа за масакрот кај Смилковско Eзеро.
Обвинителката Лилјана Спасовска побара одлагање на следната расправа сѐ додека не се прибават сите факти, коишто ги опфаќаат и доказите со коишто располага Специјалното јавно обвинителство. Повикувајќи се на соопштение коешто било објавено на веб-страницата на Врховниот суд, во кое се тврдело дека СЈО не одговорил на барањето на Судот, таа смета дека јавната расправа по жалбите треба да се одложи на неопределен рок.
„Откако претседателот на Советот ја одложи седницата за 9 јуни, побарав да постапат согласно со член 361 од ст. 4 од Законот за кривична постапка, а тоа е ситуацијата во која за некој предмет во жалбената постапка ќе се појават нови факти, тогаш судијата-известител побарува од тие државни органи, правни лица или институции што ги поседуваат тие факти, да ги прибави списите или извештаите поврзани со тие нови факти. Без разлика дали тие нови факти ќе имаат директни или индиректини импликации на овој кривично-правен настан. Но, и мене начелото на легалитет и законито постапување во секој кривичен предмет и законита постапка ме обврзува да го барам ова од Врховниот суд, а посебно Врховниот суд го обврзува, зашто тој е највисокиот суд во Република Македонија и неговите одлуки треба да бидат правични, правно предвидливи и правно извесни. Тоа значи да се базираат на доказите во секој кривично-правен предмет“, изјави обвинителката Спасовска.
Според Вангеловски, пак, обвинителката има или погрешна или делумна информација, за постоење на допис од СЈО. „Дописот не е во никаква корелација со овој предмет“.
М. Т.
