Претседателот на САД, Доналд Трамп, изјави дека последните напади на Русија врз Украина се „одвратни“, додавајќи дека Кремљ има „околу осум дена“ да склучи мировен договор или да се соочи со санкции, изјави тој пред новинарите во Белата куќа на 31 јули, пренесува Кијив Индипендент.
„Русија, мислам дека е одвратно она што го прават… Мислам дека она што го прави Русија е многу тажно“, рече Трамп на брифингот.
Тој исто така рече дека Стив Виткоф, неговиот специјален пратеник за Блискиот Исток, ќе ја посети Русија уште еднаш по неговото сегашно патување во Израел. Тој не ги прецизираше датумите или агендата на неговата посета.
Објавата дојде по смртоносниот руски напад врз Кијив во кој загинаа најмалку 27 лица и нешто повеќе од една недела пред новиот рок на Трамп, 8 август, за Русија да склучи мировен договор за да се стави крај на војната против Украина.
Трамп рече дека Кремљ има „околу осум дена“ да склучи договор или ќе се соочи со санкции, иако беше нејасен во врска со казните што Вашингтон ќе ги наметне ако Москва не успее да постигне мировен договор.
„Да, ќе воведеме санкции – не знам дали санкциите го мачат (рускиот претседател Владимир Путин)… Не знам дали тоа има некаков ефект, но ќе го сториме тоа“, рече тој.
Високиот американски дипломат Џон Кели му рече на Советот за безбедност на Обединетите нации на 31 јули дека Белата куќа сака договор за завршување на војната на Русија во Украина до 8 август. Неколку дена претходно, Трамп предупреди дека царините за Москва ќе стапат на сила во рок од 10 дена, освен ако Кремљ не се согласи на прекин на огнот.
Виткоф имал лични состаноци со Путин во неколку претходни прилики. Инвеститор на недвижности без претходно дипломатско искуство, Виткоф се појави како клучен претставник на администрацијата на Трамп во Москва, иако неговото потпирање на преведувачите на Кремљ и коментарите за териториите окупирани од Русија предизвикаа загриженост и контроверзии.
Бидејќи јавната реторика на Трамп кон Кремљ се заострува во последните недели, Виткоф, наводно, врши притисок за ублажување на санкциите против руската енергија.
Во Кијив, бројот на жртви од рускиот комбиниран напад се зголеми на 26, а 156 лица се ранети, објави на Телеграм началникот на Воената администрација на Киев, Тимур Ткаченко, пренесува Укринформ.
„Ажурирани информации за нападот на 31 јули од 6:30 часот наутро: Познато е дека загинале 25 лица, вклучувајќи три деца. Операцијата за спасување е во тек“, се вели во пораката.
„За жал, бројот на жртви се искачи на 26 лица“, додаде Ткаченко подоцна.
Петок, 1 август, е прогласен за Ден на жалост во Кијив во спомен на жртвите од рускиот комбиниран напад на 31 јули.
Д. Мишев
