По три години активна борба за подобрување на положбата на студентите во Македонија, Студентскиот пленум за првпат присуствуваше на седница на собраниската Комисија за образование, наука и спорт, на која беше усвоен Извештајот на ректорот за работата на Универзитетот „Св. Кирил и Методиј” во Скопје за периодот од 16 септември 2015 до 15 септември 2016 година.
ЦИВИЛ Медиа разговараше со Деа Здравковска од Студентскиот пленум за тоа што за нив значи присуството на седницата и што очекуваат во иднина, во делот на нивната вклученост во решавањето на проблемите и на прашањата што ги засегаат студентите.
„На Комисијата бевме поканети како гости, а претседателот се повика на Деловникот за работа и го објасни нашето присуство. Сепак, за пратениците од опозициската ВМРО-ДПМНЕ, тоа беше проблем, не навредија нарекувајќи не циркузанти, а Комисијата – циркус. Со процедурални забелешки се одолговлекуваше дискусијата, и ние немавме право на збор“, објаснува Здравковска, која посочи дека претставниците на Студентскиот пленум биле подотвени со аргументи, забелешки и прашања.
„Во извештајот што го презентираше ректорот Никола Јанкуловски, не беше споменато ништо за формирање на комисијата за промена на статутот на УКИМ, во делот на студентското организирање. Исто така, извештајот не содржи ништо за програмата на Студентскиот парламент и за финансискиот извештај што беше одобрен, и покрај тоа што имаа нелегално избран в.д. претседател. Нашите забелешки доколку ни беше даден збор, ќе беа во оваа насока“, вели Здравевска.
„Опозицијата се плаши од нас, од нашите прашања, коментари и аргументи. Сепак, поканата на оваа седница е позитивен исчекор и се надеваме дека во иднина, расправите ќе бидат отворени за експертската јавност“, смета Здравковска.
Во извештајот не е содржана ниту работата на Комисијата за истрага на случувањата поврзани со студентските избори. За ова, ЦИВИЛ Медиа разговараше со пратеничката од СДСМ, Ивана Туфегџиќ.
„Одговорот на ректорот Никола Јанкуловски, во врска со мојата забелешка дека во извештајот се избегнати случувањата околу изборот за студентски претседател, беше дека во рамки на УКИМ била спроведена истражна постапка, но само поради тоа што Студентскиот парламент немаше аргументи, работата на комисијата не е завршена. Универзитет не може да спроведува истражна постапка за активности на невладина организација како што е Студентскиот парламент. Тоа е работа на органите на прогон“, појаснува Туфегџиќ.
На седницата присуствуваа и претставници на Студентскиот парламент, Професорскиот пленум и Независниот академски синдикат.
Марија Теговска
