Со оставката на претседателот на опозициската партија, се става точка на една мачна историја на Македонија – вели д-р Сашо Орданоски, врвен политички аналитичар, за ЦИВИЛ Медиа во серијалот „Перспективи 2018“, снимен пред новогодишните празници.
Орданоски предвидува густа агенда од настани и процеси во 2018 година, пред сѐ во доменот на процесите поврзани со евро-атлантската интеграција.
„Зависи од нас“ – вели Орданоски, но не сѐ, бидејќи политички одлуки треба да се донесат на различни нивоа и надвор од нашата земја. Затоа, Орданоски е еден од малкуте во земјава кои повикуваат на подготовка и на план Б, доколку доживееме разочарување на пролет, кога би требало да се донесат одлуки околу членството на Македонија во НАТО.
Овој разговор е дел од серијата видео-изјави под заеднички наслов „Перспективи 2018“ во кој учествуваа околу 20 врвни експерти и претставници на граѓанското општество. Ова е втора изјава објавена во серијалот. „Перспективи 2018“ е дел од проектот „Слободни медиуми за слободно општество“, финансиран од Министерството за надворешни работи на Сојузна Република Германија.
Биљана Јордановска
Камера и фотографија: Атанас Петровски
Монтажа: Биљана Јордановска